आसवे | Maayboli

Submitted by तुष्कीनागपुरी on 24 January, 2011 - 12:26

फार झाली फार झाली आसवे
पापण्यांना भार झाली आसवे

गाव हा ओसाड का झाला असा?
याच जागी ठार झाली आसवे

राख केले वेदनेला जाळुनी
पेटता अंगार झाली आसवे

भोग होते आर्जवी पाशातले
भोगता गर्भार झाली आसवे

दुःख त्यांचे पाहताना लाजली
गोठली, बेकार झाली आसवे

तुषार जोशी, नागपूर
१० नोव्हेंबर २०१०, २२:३०

गुलमोहर:

मराठी गझल

शब्दखुणा:

आसवे

शेअर करा

सर्व ओळी स्वतंत्ररीत्या छान

सर्व ओळी स्वतंत्ररीत्या छान वाटल्या.

(मतला सोडून)

धन्यवाद!

-'बेफिकीर'!

Submitted by बेफ़िकीर on 24 January, 2011 - 15:07

बेफिकीर जी, तुम्ही प्रतिसाद

बेफिकीर जी,

तुम्ही प्रतिसाद दिलात म्हणून धन्यवाद. साध्या सुध्या रचनेला तुम्ही दिलेले प्रोत्साहन मला लक्षात राहिल. तुम्हाला जे शेर सपाट वाटत असतील ते सरळ सांगत चला, मला शिकायलाच मिळेल.

(विद्यार्थी)
तुषार

Submitted by तुष्कीनागपुरी on 24 January, 2011 - 19:46

तुषारजी, मला जे वाटले ते

तुषारजी,

मला जे वाटले ते प्रामाणिकपणे म्हंटले. क्षमस्व, आपल्याला राग आला असल्यास!

मी विद्यार्थी नाही आहे का? मी माझा वरील प्रतिसाद आपल्याला नको असल्यास रद्द करून टाकेन.

Submitted by बेफ़िकीर on 24 January, 2011 - 19:58

अरे, वेगळा अर्थ घेऊ नका बेफिकीर. तुम्ही गझलांना प्रोत्साहन देता हे मला आवडते. तुमच्या अभिप्रायाचा राग तर आला नाहीच पण तुम्ही नि:संकोच पणे असेच लिहित जा अशी विनंती आहे. अगदी एखादा शेर सपाट वाटला तर कसे सांगू? किंवा याला काय वाटेल असे न समजता सांगत जा हीच विनंती.

(विद्यार्थी) असे मी लिहिलेय ते सवयीने, रागाने नाही काही. मी फारच हौशी कलाकार आहे हो. लेखन हा प्राथमिक उपक्रम नाही. चोखंदळ वाचकांच्या अभिप्रायांनीच शिकायला मिळते हा माझा विश्वास आहे.

(विनयपूर्वक)
तुषार

Submitted by तुष्कीनागपुरी on 24 January, 2011 - 20:30