अलिकडे - पल्लि

हवामान फार बदललंय नाही...
आपण लहान असताना कसं होतं...
असंच काही ऐकत असतो आपण
असंच काही बोलत असतो आपण.
हवाच काय इथं तर वारासुद्धा
पुर्वीसारखा वहात नाही.
माणसामाणसांतला माणुस
अलिकडे कुठेच सहसा दिसत नाही..
पहाटेचं धुकं दिसतच नाही हल्ली,
मन झालंय मुकं; बोलतच नाही.
डोळ्यामध्ये असंख्य प्रश्नांचं पाणी
आणि खोलवर हरवलेल्या नात्यांची
तीच ती बेसूर गाणी...
रस्ते बदलले गाव बदलला
रस्त्याच्या मध्येच येतो म्हणुन
देव सुद्धा हलला.....
वेगवेगळ्या गर्दीमध्ये
हरवलेले चेहरे पुन्हा सापडत नाहीत,
मन मोकळे ओतावे असे
रिकामे कुणी असत नाही.....
हवामान आताशा बदललंय,
वातावरण तापायला लागलंय!
ढग भरून आले तरी
पाउस कसा बरसत नाही........