दलिया खिचडी

Submitted by अल्पना on 24 November, 2009 - 03:56
प्रत्यक्षात लागणारा वेळ: 
२० मिनिटे
लागणारे जिन्नस: 

१ वाटी दलिया, पाऊण वाटी सालं असलेली मुगाची डाळ, १ कांदा उभा चिरुन, २ लसणाच्या पाकळ्या, एक आल्याचा तुकडा, १ हिरवी मिरची, २ चमचे खोबर्‍याचा किस (ओला नारळ असेल तर उत्तम), १ गाजर, पाव वाटी मटार, १ टॉमेटो , थोडासा फ्लॉवर, १ बटाटा, २ चमचे धण्याची पुड, १ चमचा कच्चा मसाला, चवीप्रमाणे मीठ. फोडणीसाठी तुप, जीरे, मेथ्या, हिंग.

क्रमवार पाककृती: 

कुकरमध्ये थोडेसे तुप घेवून त्यात जीरे अन मेथ्याची फोडणी करावी. त्यातच ठेचलेलं आलं-लसूण्-हिरवी मिरची परतावी. हिंग घालावा. यामध्ये खोबरे थोडेसे परतून मग उभा चिरलेला कांदा परतावा. त्यानंतर दलिया परतून घ्यावा. मग यात टॉमेटो व इतर भाज्या घालाव्यात. नंतर धुतलेली डाळ घालावी. उरलेला सगळा मसाला व मीठ घालुन चार वाट्या पाणी घालावे. दोन शिट्ट्यांमध्ये दलियाची खिचडी तयार.

वाढणी/प्रमाण: 
२-३ जणांसाठी
अधिक टिपा: 

आमच्या सासरी थंडीमध्ये शक्यतो तांदुळ खात नाहीत. सर्दी -तापाने आजारी व्यक्तीला तर भात थंड असल्याने खिचडी देणे टाळतात. अश्यावेळी ही दलियाची खिचडी करतात.
मी बर्‍याचदा मुगाच्या डाळीऐवजी मुग अन हरभर्‍याची डाळ मिक्स करुन घेते. फक्त असे केल्यात एखाद्-दुसरी शिट्टी जास्त करावी लागते. तसेच बरेचदा यात इतर भाज्यांबरोबर सोया चंक्स पण घालते

माहितीचा स्रोत: 
हिमाचल प्रदेशी ड्रायव्हरची बायको.. :)
आहार: 
शाकाहारी
पाककृती प्रकार: 
उपाहार
प्रादेशिक: 
पंजाबी
शब्दखुणा: 
दलिया
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

भरड दळलेला गहु. गहु तसा भरड दळायच्या आधी त्यावर काही प्रोसेस करतात का हे माहित नाही. इंग्रजीत बहुदा Cracked Wheat म्हणतात.
हा दलिया वापरुन दुध घालुन खीर किंवा शिर्‍यासारखा पदार्थ पण करतात. तसेच दलिया वापरुन सांज्यासारखा पण पदार्थ करता येतो. हिवाळ्यामध्ये खायला पौष्टिक पदार्थ.

Submitted by अल्पना on 24 November, 2009 - 04:20

>>१ चमचा कच्चा मसाला
कच्चा मसाला म्हणजे काय?
बाकी पाकक्रुती मस्त आहे. वन डिश मिल वाटतेय अगदी !

Submitted by राधिका on 24 November, 2009 - 09:22

मला डायटीशीयननी दलिया सुचवलेला डायेट मध्ये बदल करण्यासाठी...
अशी दलिया खिचडी मी फोडणी न देता करते आणि खाते.... चवीलाही चांगली, पोटभर्रीची, आणी महत्वाचे म्हणजे वजन कमी करायला मला खुप मदत झाली ह्याची.

वरील कृतीचा खुप उपयोग होईल मला अजुन बदल आणण्यासाठी. मी पाहिलेय की गरम मसाल्याऐवजी काळा मसाला वापरला तर चव खुप छान येते.

Submitted by साधना on 24 November, 2009 - 22:26

अग आमच्याकडे आई नेहेमीच्या खिचडीसाठी काळा मसाला / गोडा मसाला नाही वापरत. कच्चा मसाला वापरते (पुलाव साठी पण तोच वापरते, बहुतेक अन्नपुर्णामधल्या पुलाव मसाल्याच्या प्रमाणानुसार करते) नक्की प्रमाण माहित नाही. मी तिच्याकडूनच घेवून येते.
गोड्या मसाल्याने पण छानच होते खिचडी.

Submitted by अल्पना on 23 January, 2010 - 04:52

काल केलेली ही खिचडी मी. माझ्याकडे पण पिवळी ( सालीशिवाय) मूगडाळ होती - तीच घातली. अन फ्लावर नव्हता म्हणून लाल अन हिरव्या फुग्या मिर्च्या घातल्या. मस्तच झाली एकदम. पुढच्यावेळेस प्रेशर पॅन मधे न करता साध्या भांड्यात करून बघणार.

Submitted by मेधा on 24 January, 2010 - 07:26

दलियाच्या ऐवजी तांदूळ वापरले. दलिया नव्हता. बाकी हिच रेसिपी. कच्चा मसाला ऐवजी खडा मसाला वापरला. एकदम मस्त चव.

मी नेहेमी खिचडीत ४ कप पाणी घालयच असेल तर ३ कप पाणि आणि एक कप दूध वापरते. फार छान लागते खिचडी.

Submitted by आर्च on 24 January, 2010 - 21:49

अल्पना, गेल्या आठवड्यात दोनदा केली लागोपाठ एकदा नुसतंच पुलाव सारखं केलं होतं डाळ न घालता तेही आवडलं सगळ्यांना. जाम हेवी होतं पण थोडंसच खाल्ल तरी पोट फुल्ल.

तुला धन्नो या रेसिपीसाठी Happy

Submitted by श्यामली on 26 January, 2010 - 11:16

अल्पना, कालच ही रेसीपी करुन पाहिली.
छान झाली होती.
आर्च, सेम Happy मी पण थोडे दुध घालते खिचडी आणि पुलाव करताना, त्याने छान चव येते.

Submitted by मीपुणेकर on 28 January, 2010 - 15:58

आज पुन्हा केली ही खिचडी. अशी लसूण खोबरं घातलेली डाळ-तांदुळ खिचडी मला एरवीच खूप आवडते. ही पण आवडायला लागलीये. ट्रॅडिशनल ओट खपवायला म्हणून एक वाटी दलिया बरोबर अर्धी वाटी ओट घातले. चवीत अर्थातच फरक पडला नाही.

ओटच्या आयड्याबद्दल आर्च (आणि रुनी ?) ला धन्यवाद Happy

Submitted by तृप्ती आवटी on 20 March, 2010 - 20:19

मस्त झाली होती!!! वाफवून केली. पण कच्चा मसाला म्हणजे काय? मी त्यात काळे मिरे, सिनॅमन आणि पान टाकलेल.

Submitted by adi787 on 4 March, 2012 - 15:28

कच्चा मसाला म्हणजे खिचडी किंवा पुलावाचा मसाला. हा मसाला करताना मसाल्याचे पदार्थ भाजत नाहीत. सहसा मी ताजाच करते हा मसाला १-२ वेळा पुरेल इतका.
मी ह्या प्रमाणात करते - ४ चमचे धणे, २ चमचे जीरे, १ चमचा शहाजीरे, ४-५ दालचीनीच्या काड्या, २ मोठ्या विलायच्या, ३-४ छोट्या वेलच्या, ३-४ लवंगा, ४-५ काळे मिरे, २ तमालपत्राची पानं. सगळे पदार्थ एकत्र करुन कच्चेच मिक्सरमध्ये कुटून घ्यायचे. मसाला तयार.

Submitted by अल्पना on 5 March, 2012 - 00:46

माझी मुलगी लहान असताना पोळी खयचीच नाही तेव्हा मी हा पर्यायी गव्हाचा करयाची . खूप छान लागते ही खिचडी!.
आज बर्याच दिवसानी करून बघते!

Submitted by मीरा on 12 November, 2016 - 17:06