रवा नारळ लाडू

पुढच्या वेळी साखर अडीच वाट्या >>> हो पुढच्या वेळी नक्कीच कमी गोड करणार.

ममो सेम याच प्रकाराने लाडू केले. काल संध्याकाळी पाकात ढकलले नी जेवणानंतर लाडू करायच्या ऐवजी नाईट मॅनेजर बिंज वॉच केले. सकाळी आरामात उठून लाडू केलेत तरी सुरेख वळलेत.

काय सुरेख सुबक दिसत आहेत. अगदी एकसारखे!

फोटोतले लाडू जहबरी दिसतायत. हे बघून मलाही रवा लाडू करायची सुरसुरी आल्यासारखी वाटतेय. टिकली तर करेन.

बाकी ममो, शेंगदाणे निवडताना खवट शेंगदाणे कचर्‍यात टाकून द्यावे ही टिप तुला माहित आहेच.

किती सुबक आणि एकसारखे दिसतायत लाडू! तोंपासु!!

कोणीतरी खायला पण द्या रे हे रवा लाडु…

झाकण ठेवायची टीप केल्यामुळे छान मॉईस्ट झाले होते.
माझी आई करंजीच्या राहिलेल्या सारणाचे लाडू करायची सुक्या खोबर्याचे तेही फार आवडतात पण हे ओल्या नारळाचे पहिल्यांदाच केलेत चवीला फार छान झालेत.

मी पण हे लाडू केलेत पण पाकाचा धाक असल्याने बिना पाकाचे केलेत. मस्त मऊ झालेत (वेगळ्या धाग्या वर रेस्पी टाकावी का?
. ममो तुमचे लाडू इतके एकसंघ गोल कसे?

सर्वांचेच लाडू दिसायला सुरेख असल्याने मोह होतोय.
कमी गोडाचे किंवा मधूमेहींसाठी चालणेबल लाडू बनवता का कुणी ?

मी काल बनवले.
ओलं खोबरं नव्हतं म्हणून dedicated वापरलं
पाक अजून जरा पक्का व्हायला हवा होता असं नंतर वाटलं
2 तास झाकणं देऊन ठेवलं होतं . मग बघितलं तरं वरचा रवा अगदी भुसभुशीत झाला होता , खालचा पातेल्यात दगडासारखा क डक होऊन चिकटलेला वाटला . चमच्याने खरवडून , सुरीने भोसकून निघाला.
हाताने सारखा केला तर लक्षात आलं थोडी कचकच लागतेयं आणि लाडू अजिबात बांधले जात नाहीयेत.
मग परत अगदी 2-3 मि. मंद आचेवर परतलं मिश्रण आणि परत झाकून ठेवलं. रात्री लाडू वळता आले पण मिश्रण moist वगैरे नाही वाटलं.
परत भाजल्यामुळे लाडू लालसर झालेत , पांढरे नाहीत.
माकाचु ??

मुळात रवा नीट भाजलायं हे कसं कळतं ? तोपर्यंत लालसर नाही का होतं ?
मिश्रण भुसभुशीत का झालं असावं ?

स्वस्ति एकदम मंद आचेवर साधारण पंचवीस मिनिट आणि दहा मिनिट (अधिकचे) ओले खोबरे घालून चांगले भाजले जाते. गुलाबी रंग येतो आणि वास पण चांगला येतो. आच थोडी जरी जास्त ठेवली तर लाल रंगावर भाजला जाईल रवा आणि करपेल.
तुम्ही डेसिकेटेड खोबरे घेतले तर ते वेगळे दोन मिनिट शेकून रव्यात मिक्स केले असते तरी चालले असते. कारण ते तसेही ओले नसते. पाक पण बहुदा जास्त शिजला असावा. मोठ्या आचेवर पहिल्या तीन ते चार मिनिटात साखर विरघळते. नंतर मध्यम आचेवर दोन मिनिट आणि मंद आचेवर दोन ते तीन मिनिटात एकतारी पाक चांगला शिजतो आणि तयार होतो. झाकण ठेवल्यावर तुम्ही बहुदा मिश्रण हलवले नाही. झाकण ठेवल्यावर पहिले तीस मिनिट दर दहा मिनिटांनी ते हलवावे म्हणजे घट्ट गोळा होत नाही. झालाच तर सरळ मिस्कर मधून काढून दुधाचा हबका मारून लाडू वळावे.

लंपनने सांगितलेच आहे तरी माझे दोन आणे…. डेसिकेटेड कोकोनट असेल तर तूप जरा जास्त हवे कारण डेकोत तेलाचा अंश कमी असतो. मीकुठलाही पाक दुधात करते.लाडू कडक होत नाही.

मी कधी दूधाच्या पाकाबद्दल ऐकलं नव्हतं मंजूताई. नेहमीच्या पाकासारखाच करायचा का? आणि दूधाच्या पाकात केलेले पदार्थ मुंबईच्या हवामानात टिकतील का? लाडूचा नेक्स्ट स्लॉट करून पाहिन असा. बाकी दूधाच्या पाकामुळे अगदी राजस पदार्थ होत असेल.

ममो, बहुतेक प्रत्येक लाडवाच्या/वड्या पाककृतीमध्ये दुधातला पाक ट्रीक सांगितलेली असेल

हा धागा रवा लाडू करून झाल्यावर पाहिला. त्यामुळे पाकातल्या रव्याचा कढईत दगड होणे , ते निस्तरुन पुन्हा लाडू वळणे. हे सगळे करून झाले.
मंजूताई , दुधातला पाक ही नवीन गोष्ट आहे माझ्यासाठी !! नंतर सांगाल का ?

पाण्याच्या ऐवजी दूध वापरायचे. दूधात पाक केला तरी लाडू टिकतात पण शंका असेल तर ममोची युक्ती वापरायची. ओल्या नारळाचे पदार्थ जास्त दिवस टिकत नाही आणि टिकण्यासाठी उरायला तरी हवे ना

दुधातला पाक ही नवीन गोष्ट आहे माझ्यासाठी.... +१.

मी यंदा रवा - बेसन लाडू केले, तेव्हा दूध घालून पाक केला. लाडू चांगले झाले. दुधाची वेगळी अशी चव मला जाणवली नाही. पण खाणार्‍यांनी खवा घातलाय का? असं विचारलं. ती दुधाची किमया असणार.
इथे सई केसकरचा एकतारी- दोनतारी असा लेख आहे. त्यात पाक करतानाचं विज्ञान चांगलं समजावलं आहे. पाक करताना बिचकणार्‍या मंडळींनी वाचून बघा.

पाण्याऐवजी दूध वापरायचे,पण ते किती वेळ उकळायचे , एकतारी, दोनतारी कसे समजते ?

दूधाच्या पाकात केलेले पदार्थ मुंबईच्या हवामानात टिकतील का? >>> मलाही नेहमी हाच प्रश्न पडतो. अगदी हबका मारला तरीही.

जाड रव्याचे लाडू छान नाही होतं. त्तू कोणता घेतला होतास ? >>> अगदी बारीक , चिरोटी रवा.
मी पहिल्यांदाच केले , म्हणून अगदी नैवेद्याची छोटी वाटी वापरली. आठेक लिंबाएवढे लाडू झाले.
चव आता उद्या च कळेल. पण आता confidence आला.
आमच्याकडे बेला बनवतात. मला आवडत नाहीत , म्हणून यावेळी मी रलाचा घाट घातला.

मी पहिल्यांदाच केले, एक वाटी रव्याचे पण माझे बिघडले. पाक घातल्यावर एकदम कडक गोळाच झाला. थोडावेळ झाकण ठेवले होते. मग तो गोळा मिक्सर मधून बारीक केला तो. आता लाडू वळलेच जात नाहीयेत. त्याला गरम करून तूप घालून बघितले, दुधाचा हात लावला पण काही उपयोग होत नाही. रवाच येत आहे हातात. २ /३ चमचे घेऊन शिरा पण करून पाहिला पण दाताखाली मऊसूत नाही लागत. काय करू आता त्या मिश्रणाचं?

चैत्रगंधा, तुझा आयडी आवडतो. नारळ घातल्यावर खडक व्हायला नको. ह्या रावांना खूप कमी तूप लागतं. नारळाने ओशटपणा येतो. सुधारण्यापलिकडे गेलेलं दिसतंय प्रकरण ..

चैत्रगन्धा त्यात अन्दाजे थोड थोड कन्डेस्ड मिल्क टाकुन परतुन घे आणी मिश्रण कडा सोडु लागल की तुप लावलेल्या ताटात वड्या थाप.

मंजूताई, प्लीज दुधातला पाक कस करायचा ते लिहिता का? प्रमाण वगैरे आणि भाजलेला रवा त्यात कधी घालायचा.

आर्च, साखर बुडेल इतकं दूध घालायचं उकळायला ठेवून ढवळत राहायचं . दूधावर फेस येऊन वर येऊ लागलं की गॅस बंद करायचा. रवा नारळाचे मिश्रण टाकायचं. मी झाकण ठेवत नाही. रवा पाकात मुरायला ठेवायचा. मिश्रण कोरडे वाटलं तर दूध घालायचं सैल झाले तर एक चटका द्यायचा ... हाका नाका चटका मिश्रणाला द्यायचा बरं का
तापमान महत्त्वाचं.. रवा नारळ भाजले की लगेच पाक करायला घ्यायचा.

चैत्रगंधा, तुझा आयडी आवडतो>>धन्यवाद मंजूताई
चैत्रगंधा तिच्या मुलीच ही नाव आहे असं वाचलेलं अंधुक आठवतंय.>>> मान गये ममो.. काय स्मरणशक्ती आहे.

साखरेचे पाणी घालून बघते. नाही झालं तर मग प्राजक्ताच्या टीपप्रमाणे कंडेन्स मिल्क ट्राय करेन.

मी बनवलेले लाडू आज खाल्ले. चवीत काहीतरी missing वाटलं.
लेकाला आवडले , खोबर्याचे लाडू लागततायत म्हणाला. (म्हणजे खोबर्याची चांगली चव लागतेय , रव्याची चव नक्कीच लागत होती, खोबर्याची नक्कीच overpowering नव्हती )
आई म्हणाली रवा अजून भाजायला हवा होता आणि खूप गोड लागतायेत. साखर जरा कमी हवी होती.
एकंदरीत , पहीला प्रयत्न .. not bad .
सर्वांना धन्यवाद.