वन डिश मील- डाळी दोसा - मॅगी

सगळ्यांना गणेशोत्सवाच्या हार्दिक शुभेच्छा!

साहित्य:
मूग, तूर आणि मसूर या डाळी - प्रत्येकी अर्धी वाटी
तांदूळ - एक वाटी
लसूण - पाच सहा पाकळ्या
हिरवी मिरची - दोन
जिरे - एक टीस्पून
मीठ चवीनुसार
लोणी, लसूण चटणी रंगरंगोटीसाठी!

कृती:
१. डाळी आणि तांदूळ पाणी थोडे वर राहील इतके भिजवून दिवसभर ठेवा. रात्री ते पाण्याशिवाय मिक्सरमधून फिरवून रवाळ पातळसर पीठ झाकून ठेवा.

२. सकाळी पीठ आंबून छान फुगलेले असेल. त्यात लसूण, हिरवी मिरची आणि जिऱ्याचा ठेचा आणि मीठ घाला. थोडे पाणी घालून बॅटर नीट ढवळून घोटून घ्या.

३. तवा तापल्यावर त्यात थोडं तेल फिरवून दोसा घाला. झाकण ठेवा, थोड्या वेळाने उलटून दुसरी बाजू शिजू द्या. तव्यावरून नीट सुटायला लागला की काढून ताटात घ्या.

४. चमचाभर घरचे पांढरे लोणी दोश्यावर वितळवून वरून लसणीचे तिखट भुरभुरा. आवडत असेल तर दह्याबरोबर खाऊ शकता.

मी दोसा म्हणतेय पण या पदार्थाला धिरडे, आंबोळी, घावन काहीही म्हणता येईल :p लहान मुलांसाठीही हा उत्तम पौष्टिक पदार्थ आहे. आवडीने खातात.

वेळ: एक दिवस आणि एक रात्र पीठ आंबून तयार होण्यासाठी, दोसा दहा मिनिटात होईल.