फॉर्म नंबर १७

बारावीचा निकाल लागला, आता दहावीचा सुद्धा लागेल. "बारावी नंतर काय?" या प्रश्नावर चर्चा, मंथन, डीबेट, धाक, विनंत्या, विनवण्या आपल्या घरात कधी ना कधी झालंच असेल. दहावीचा निकाल लागल्यावर शाळा सोडताना थोडं का होईना वाईट वाटलं असेल, मी तर पार ढसाढसा रडलो होतो, तेव्हा लै ट्रोमे झाले होते...

पण असे बरेच जण आहेत, ज्यांची काही कारणाने शाळा सुटली. त्यांना दहावी पूर्ण करता आली नाही, शाळा सुटल्याचं दुःख करायला सुद्धा वेळ मिळाला नाही. आता एखाद्या नोकरीसाठी किमान दहावी किंवा बारावी शिक्षण पूर्ण असणे गरजेचे आहे, आपण जरा चौकस का काय ती नजर असते ना, त्या नजरेने बघितलं, तर दहावी पूर्ण न झालेले खूप जणं आपल्याला आजूबाजूला दिसतील.

तर अशा सर्व लोकांसाठी, पुण्यातल्या लाईटहाऊस कम्युनिटीज फाउंडेशन (LCF) आणि ग्लोबल अपॉर्च्युनिटी युथ नेटवर्क (GOYN) यांनी एकत्र येऊन मासूम या एनजीओ मार्फत "सायंकालीन अध्ययन केंद्र" सुरु केले आहे. जे पुण्यामध्ये भोसरी, हडपसर, जनता वसाहत, पिंपरी, काशेवाडी, येरवडा, वारजे या ठिकाणी संध्याकाळी 6:00 ते 8:30 पर्यंत सुरु आहेत. इथे वह्या पुस्तकं मोफत मिळतात.

मी या उपक्रमासाठी काम करत आहेत, माझा स्वतःचा अनुभव आहे की, अशा बऱ्याच जणांना वय झाल्यामुळे लाज वाटते, ते पुढे येत नाहीत, "आता शिकून काय उपयोग?" असं म्हणतात. पण त्यांना या गोष्टी अतिशय प्रेमाने समजून सांगितल्या तर फॉर्म नंबर १७ भरायला आणि दहावी पूर्ण करायला तयार होतात, तर अशा लोकांशी नक्की बोला, त्यांना दहावी पूर्ण करण्यासाठी प्रोत्साहित करा जर काहीजणं तयार झाले, तर या नंबरवर संपर्क करायला सांगा, रणजित: 8928777644

बाकी बोअर झालं असेल तर हा उपक्रम अजून जास्तीत जास्त लोकांपर्यंत कसा पोहचवता येईल, याबद्दल गप्पा मारूया..