बेक्ड बुंदी रबडी

दरवर्षी प्रमाणे यंदाही वार्षिक ऑफिस मीटिंग डिनर दिल्ली जिमखाना क्लबच्या पार्टी कॉटेजला झाले. मे चा पहिला आठवडा असून मस्त गारगार वातावरण होतं. अशा दिल्ली पार्टी मध्ये तेपण जिमखाना आणि साऊथ दिल्ली म्हणजे फॅशन परेड बऱ्यापैकी.. उंची गाड्या, पर्स, कपडे अन् काय काय.. आपण तिथे असून सुद्धा आपले ममव मन अशा ठिकाणी काही रमत नाही. खोटेखोटे हसून, काय काय काम केलं ते उगा वाढवून सांगून, हातवारे करून करून बोलून तिथले ते दोन तीन तास घालवण्याकडे आपला कल. एखाद तास झाला की आणि स्टार्टर खादाडी झाली की मेन कोर्सला काय काय खादाडी आहे ते बघायचे. तर हा गोड पदार्थ यंदा पहिल्यांदा तिथे चाखला. फारच भन्नाट चव. कृती एकदम सोप्पी.
अव्हन २०० अं से. ला पाच सात मिनिट प्री हिट करावा. खोलगट बेकिंग पात्रात बुंदी पसरून त्यावर रबडी घालावी. हे दोन लेयर मध्ये केले तरी चालेल. आता हे पात्र बारा ते पंधरा मिनिट २०० से. ला बेक करावे. आता तयार पदार्थावर वर्ख आणि सुका मेवा पसरवावा, बुंदी रबडी तयार.