भारत का दिल देखो : (पाककृती ) मकई के खोऊंद

'भारत का दिल देखो' या माझ्या मध्यभारतातील लोकजीवनावर आधारित असलेल्या मालिकेत घेऊन आले आहे एक झटपट चविष्ट प्रकार 'मकई के खोऊंद'.
मध्यप्रदेशातील छिंदवाडा जिल्ह्यात प्रामुख्याने का प्रकार केला जातो. करायला सोपा आणि हमखास जमणारा हा नाश्त्याचा पदार्थ

पाककृती
एका खोलगट पातेल्यात तेल गरम करावे .

कडकडीत तापले की हिंग मोहरीची खमंग फोडणी दयावी.
त्यात आलं - मिरचीचे वाटण घालावे. एक दोन मिनिट जरासे परतून घेऊन त्यात ताक घालावे.
हळद व मीठ घालून ताकाला उकळी येऊ दयावी. उकळी आल्यानंतर आच कमी करून मक्याचे पीठ थोडे थोडे करत घालावे. एकीकडे मिश्रण सतत ढवळत राहावे लागते नाहीतर पिठाच्या गुठळ्या होतात.
३-४ मिनिटातच मिश्रण घट्ट व्हायला लागते.
साधारण तांदळाच्या उकडीइतके घट्ट झाले की झाकण ठेऊन २ मिनिटे वाफ काढावी.

तोवर एका ताटाला तेलाचा हात फिरवून घ्यावा.
मिश्रण गरम असतानाच उतारावून वाटीच्या साहाय्याने ताटावर पसरवून घ्यावे. नीट थापून वड्या कापाव्या.

५ मिनिटात थंड होते. लगेच खाऊ शकता किंवा वरून आणखी एक फोडणी पसरवून (ढोकळ्याप्रमाणे) पण छान लागते.
ओले खोबरे/ कोथिंबीर पेरून पण सजवता येईल.