पौष्टिक वड्या

झालं काय, की करायला गेले गणपती नि झाला मारूती (किंवा उलट. जे काय असेल ते) अशी ही पाकृ जन्माला आलेली आहे. मला पौष्टिक लाडू करायचे होते. कधी बिघडले नाहीत आजवर. आताही सगळं सामान तेच आहे, पण न जाणे कसा अंदाज चुकल्यामुळे तूप अंमळ जास्त होऊन लाडू वळयावर बसल्याजागी बसले ते उठायला तयार होईनात. म्हणून त्यांना तसंच झोपवून वड्या थापल्या. त्या गार वार्‍यावर ठेवल्यावर चिकटल्या. मग एक हलका चटका देऊन पुन्हा सोडवल्या. त्या सोडवताना वाटलं, जर्रा थांबले असते तर लाडू मस्त वळले गेले असते. असो. तेवढे पेशन्स नव्हते त्यामुळे त्यांना वड्यांच्याच जन्मात ठेवलं. शेवटी खाण्याशी मतलब!

तर,

-थोड्या तुपात मेथ्या गुलाबी रंगावर तळून घ्या. मिक्सरात टाका. त्याच तुपात बदाम भाजून घ्या. मिक्सरात टाका.
-सुक्या खोबर्‍याचा कीस भाजून घ्या. मिक्सरात टाका. खारकेची पूड (मी मुश्किलीने कशाबशा २ काळ्या खारका किसून घेतल्या पूड नव्हती म्हणून. तुम्ही तयार पूड वापरा. हात मोडतो काळी किंवा साधी खारीक किसताना) भाजा. मिक्सरात टाका.
-मुगाची डाळ गुलाबी रंगावर खरपूस करून घ्या. मिक्सरात टाका. हे सगळं करताना लागेल तसं तूप घालून पदार्थ भाजा.
-वेलची पूड तयार नसेल तर १०-१२ वेलच्या सोलून त्याही मिक्सरात टाका. आता सगळं सामान मिक्सरात आलंय याची खात्री झाली की मिक्सर चालू करून ते सगळं बारीक वाटा. अगदी भुगा न होता किंचित भगराळ राहिलं तरी चालेल. त्रास करून घेऊ नका.
-आता कणीक कोरडी भाजायला घ्या. जर्रासा रंग बदलला की अंदाजाने तूप घालत भाजा. मस्त खमंग वास येऊन रंगही आला पाहिजे. मंद आंच महत्त्वाची.
-कणीक परातीत काढा आणि याच पद्धतीने बेसन आणि नाचणीसत्त्व भाजून घ्या. नाचणीसत्त्व जास्त भाजू नका कारण ते मुळात भाजूनच करतात. हलकं गरम केलं तरी पुरे.
-आता सगळी पिठं आणि मिक्सरातलं वाटण, पीठीसाखर घालून एकत्र भरपूर मळा. सावधान!!!! या स्टेजला तूप सुटेल!! मी इथेच फसले बरं! मला मिश्रण जरा कोरडं वाटलं म्हणून मी अगदी १ चमचा तूप गरम करून घातलं नि लाडू बसले! तुमचं तसं नाही झालं तर लाडू वळा, नैतर वड्या थापा!
-जे काही कराल ते एकमेकांना चिकटून ठेवू नका. वड्या किंवा लाडू, एकमेकांना चिकटले तर मोडून नवीन रेस्पी करा नि इथे लिहा.