दालचिनी रोल्स / सिनॅमन रोल्स (अर्थात कानियेल बुलार)

Submitted by नलिनी on 23 July, 2015 - 19:26
प्रत्यक्षात लागणारा वेळ: 
५ तास
लागणारे जिन्नस: 

मैदा चार वाट्या / कप
बटर अर्धी वाटी / कप
कोमट दूध एक वाटी / कप
मीठ १ टि स्पून
साखर पाव - अर्धा वाटी / कप
ड्राय यिस्ट १ टेबल स्पून
अंडी २ * ( अंडी न खाणारे अंडी वगळू शकता)
केशर (ऐच्छीक)
सारण / फिलिंग

ब्राऊन शुगर पावडर एक वाटी / कप
दालचिनी पावडर १ टेबल स्पून (३ टि स्पून)
मेल्टेड बटर १/३ वाटी / कप
वेलची पावडर (ऐच्छीक)
व्हॅनिला पावडर / इसेन्स (ऐच्छीक)

सजावटीसाठी ग्रॅन्युलेटेड साखर

क्रमवार पाककृती: 

१) एका भांड्यात मैदा घेवून एका बाजूला यिस्ट व दुसर्‍या बाजूला मिठ टाकावे व व्यवस्थित एकत्र करुन घ्यावे.

२) दुसर्‍या भांड्यात कोमट दूध, केशर पावडर, बटर, साखर घेऊन बीटर ने एकत्र करून घ्या. * मिश्रण कोमट आहे ह्याची खात्री करून ह्यात व्यवस्थित फेटलेली अंडी घालून परत सगळे मिश्रण परत फेटून घ्या.

३) मैद्यात दुसर्‍या भांड्यातील मिश्रण ओतून चमच्याने व्यवस्थित एकत्र करून घ्यावे (मळायचे नाही) . ते साधारण असे दिसेल.

४) तासभरासाठी हे मिश्रण उबदार जागेत झाकून ठेवावे. त्यानंतर ते असे मस्त फुगून येईल.

५) त्यातली हवा काढून व्यवस्थित फॉईल गुंडाळून ह्याची रवानगी (१ ते ३ दिवसांसाठी) फ्रीज मधे करावी. हवे तेव्हा फ्रीज मधून बाहेर काढावे व साधारण तापमानाला वापरायला घ्यावे.(साधारण अर्ध्या तासाने)

६) फिलिंग / सारणासाठीचे साहित्य एकत्र करुन घ्यावे.

७) क्र. ५ मधील पिठाचे साधारण दोन गोळे करून घ्यावे. एक गोळा / उंडा घेवून लांबसर लाटावे. व त्यावर सारण एकसारखे पसरवून घ्यावे.

८) लांब बाजूने घट्ट गुंडाळी करून घ्यावी व साधारण १ ते दिड इंचावर कापावे.

९) हे रोल साजावटीच्या साखरेत एका बाजूने घोळून बटर पेपर लावलेल्या बेकींग ट्रे मधे एकमेकांपासून जरा अंतरावर ठ्वावे.

१०) रोल्स रेज होण्यासाठी तासभर तरी उबदार जागेत ठेवावेत. मी ओव्हन जरासे गरम करून त्यातच ठेवते.

११) १८० डिग्री तापमानाला साधारण १५-२० मिनिटे ओव्हन मधे बेक करावे.

जरा जवळून

स्विडन मधे ह्या कानियेल / कानेल बुलार (kanelbullar) च्या नावाने खास एक दिवस साजरा केला जातो. ह्याच्या अनेक रेसेपी युट्यूबवर सुद्धा उपलब्ध आहेत.

वाढणी/प्रमाण: 
साधारण २५- ३० नग होतात.
अधिक टिपा: 

मी वर दिलेल्या प्रमाणाच्या दुपटीने केले होते. साधारण ५० नग झाले होते.
साखर तसेच दालचिनी पावडर कमी अधिक प्रमाणात वापरता येईल.
फ्रीज बाहेर आठवड्याहून अधिक टिकायला हवेत. माझ्याकडे ३-४ दिवसांहून अधिक शिल्लक राहतच नाहीत.
खाताना असेच थंड किंवा जरासे गरम करून खाऊ शकता.
शेवटचा फोटो वाफाळत्या चहा / कॉफीसोबत काढायचा होता पण रात्री अकरा वाजता केलेला तो चहा ओतून द्यावा लागला असता त्यामूळे तो फोटो काढायचा मोह टाळला.

माहितीचा स्रोत: 
युट्यूब
आहार: 
शाकाहारी
पाककृती प्रकार: 
गोड पदार्थ
बेकरी पदार्थ
शब्दखुणा: 
दालचिनी रोल्स
सिनॅमन रोल्स
कानियेल बुलार
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

मस्त .. भारतीयीकरण आवडलं .. Happy

"आधी फोटो बघताना अंड्यात केशर??" असं वाटलं .. पण सिनॅमन च्या चवीपुढे केशर वेलची ची चव लागते का?

Submitted by सशल on 23 July, 2015 - 20:33

व्वा, अप्रतिम दिसतायंत. फोटोही अगदी प्रोफेशनल. शेवटच्या फोटोतला रोल उचलून खायची भयंकर इच्छा झाली Happy

Submitted by अगो on 24 July, 2015 - 00:43

मस्त आहेत दिसायला. करुन पाहण्याजोगे अगदी.

पिठ इतके सैल आहे, फुगल्यावर अजुन सैल होईल. मग ते लाटता येईल? असे फुगायचे पदार्थ बनताना जर पिठ पातळ झाले तर कित्येकदा माझा पदार्थ बिघडतो कारण त्या पातळ झालेल्या पिठाला लाटण्यासाठी साधे पिठ घालुन लाटावे लागते.

फ्रिजमध्ये ठेऊन थोडे थंड करुन वापरल्याने फरक पडेल कदाचित असे वाटते.

Submitted by साधना on 24 July, 2015 - 04:30

सर्वांना, मनापासून धन्यवाद!

पण सिनॅमन च्या चवीपुढे केशर वेलची ची चव लागते का?>> केशर, वेलची किती घालता त्यावर अवलंबून आहे अर्थात दालचिनीची चव अधिक जाणवते. केशरामुळे मस्त रंग येतो.
साधना, हे प्रकरण तितकेसे पातळ होत नाही. अगदी फ्रिजमध्ये नाही ठेवले तरी तासाभराने जरासा मैदा शिवारायचा आणि मळून घेतले की जमते. जरा कमी जाळीदार होतात एवढेच. कमी प्रमाणावर करून बघ.

Submitted by नलिनी on 25 July, 2015 - 17:20

सुन्दर....घरचे साहित्य + कौशल्य वापरून केल्यावर सिनॅबॉनच्या तोंडात मारेल असे होणारच!!!
धाकट्या मुलील खूप आवडतात त्यामुळे आमच्या घरी सुध्धा बरेच वेळा होतात, रेसिपी/फोटो टाकायचा आळ्शीपणा!!
अर्थात ह्या स्विडिश रेसिपी प्रमाणे नाही, आमचा आपला Alton Brown झिंदाबाद!!

Submitted by अव्यक्त on 25 July, 2015 - 18:49

My favorite winter evening snack with coffee... Happy
पाकृ., फोटु भारी... १० वा फोटो फार आवडला.

Submitted by राधिका on 31 July, 2015 - 16:24

मस्तच ग नलु.
बेकिंगची भिती वाटते त्यामुळे करण्याची शक्यता नाहीच. धीर गोळा झाल्यास करुन पाहिन.

Submitted by प्रिंसेस on 1 August, 2015 - 05:16