टू इन वन - आठळा, शेवगाच्या शेंगा भाजी, आमटी

उन्हाळा सुरु झाला की त्या मौसमातील खास फळं खायला मिळतात. त्यातलेच फणस हे एक. ह्याच्या आठळा ह्याचे अगणित प्रकार मग आमच्या घरी सुरु होत. आठळ्याच्या पीठाचे थालीपीठ, आठळा-जवळा, आठळा-करंदी, आठळा-गवार, आठळा-वांग वगैरे वगैरे. त्यातलेच काही प्रकार देण्याचा प्रयत्न राहिल. :)(घाबरवत तर नाही नं?)
फणस आणि त्याच्या आठळा किती बहुगुणी आहेत हे गूगलून मिळेलच तसेच आजी, आई कडून एकले असेलच तेव्हा इथे ते देत नाही

आठळाची अशीच एक सुंदर व माझी आवडती रेसीपी देतेय. बघा तुम्हाला आवडते का?

हि एक टू इन वन अशी पाककृती आहे. घट्ट केली तर भाजी, पातळ केली तर आमटी म्हणून खपू शकेल पण एकंदरीत हि भाजीच प्रकारात मोडते ज्यास्त आमच्याघरी.

जिन्नसः
१) फणसाच्या सुकवलेल्या आठळा,जितकी ज्यास्त भाजी कराल तितकी ती कमी पडते. तेव्हा तुम्हाला आवडेल तेवढे घ्या. आठळा ठेचून साल काढून पाण्यात टाकून ठेवा.
२)शेवग्याच्या शेंगा वरून खरवडून धूवून मग त्याचे तुकडे करून घ्या.
३) साजूक तूप घरचे असेल तर उत्तम.
फोडणीसाठी: हिंग, राई, उभी चिरलेली एखादी हिरवी मिरची, लाल बुटक्या मिरच्या आवडतील तश्या, लसणीच्या २-३ पाकळ्या ठेचून.
वाटणः
१ वाटी खोवलेल ओलं खोबरं, १ मोठा कांदा, ७-८ लसूण पाकळ्या, मूठभर कोथिंबीर. ह्याच क्रमाने जरासे तेल टाकून छान परतून घ्यायचे वेगवेगळे , मग थंड झाले की छान गंधासारखे वाटून एकत्र करून घ्यायचे.
कोरडा मसाला:
धणे, जीरं(प्रत्येकी पाव चमचा), मेथ्या( ३-४ दाणे), जायपत्री, लवंग(१-२), अर्धं इंच दालचिनीचा तुकडा, काळे तीळ. सर्व कोरडे भाजून थंड करून पूड करावी. ह्यात पाव चमचा मालवणी लाल मसाला मिसळून ठेवावा.