तेल पोळ्या

कणीक अगदी मऊ मळावी लागते. आधी नॉर्मल मळावी आणि मग तिला आपटून(हो कणकेचा गोळा परातीत जोरजोरात आपटायचा!) मऊ तिंबून घ्यावी लागते. (पुरण आणि कणीक यांचा मऊपणा सारखा हवा असं जाणत्या बायका सांगतात!)

मग चपात्याचा तवा शेगडीवर उलटा ठेवायचा आणि त्याला थोडं तेल लावून घ्यायचं.

मग साधी पुरणपोळी करताना जसे उंडे करून घेतो तसेच पुरण भरून उंडे करावेत. पुरण थोडं कमी भरावं.

मग पोळपाटावर एक मोठा चमचा तेल पसरवून घ्यावे. लाटण्यालाही थोडे तेल लावून घ्यावे.उंड्याला हातावरच थापून छोट्या पुरीएव्हढा आकार द्यावा. मग पोळ्पाटावर ठेउन हळूवार हाताने लाटावे.

लक्षात ठेवा, लाटताना पोळी उलटायची नाही. पोळीला हळूहळू गोल आकार देत जावे.

पोळी लाटून झाली की पोळीच्या वरच्या बाजूला लाटणे ठेऊन त्यावर पोळी गुंडाळून घ्यावी, म्हणजे लाटण्याभोवती पोळीचा रोल करावा(हे खूप सांभाळून करावे अन्यथा पोळी चिकटून बसण्याची शक्यता. तेल योग्य असल्यास चिकटत नाही)
पोळीचा आपल्या बाजूचा भाग तासाच रिकामा ठेऊन, तव्यावर टाकताना तो सर्वात आधी टाकून मग लाटणे फिरवून तव्यावर रोल उघडत जावे(हुश्श्य!! हे करणं सोप्पं आहे, समजावणं कठीण!)

थोड्या वेळाने पोळी बाजूने सुटतेय का ते पहावे आणि पलटावी. खरपूस भाजून घ्यावी.

ही पोळी जास्त गोड नसल्याने आमच्या भागात गुळवणीसोबत खातात.

हा प्रकार सासरी आल्यावर पहिल्यांदा केला, खाल्लाही तेंव्हा अगदीच जमायच्या नाहीत, आत्ता संक्रांतीला मात्र उत्तम जमल्या. (दीड वर्षांची practice!)

Submitted by saakshi on 17 January, 2013 - 06:38