आभाळाच्या सागरात चांदोबाची होडी...

आभाळाच्या सागरात चांदोबाची होडी
चला बसा होडीमधे मजा करू थोडी

उसळती लाटा निळ्या
निळ्या अंधाराच्या
आदळूनी होडीवर
होतात रुप्याच्या

नजरेला येत जाते दुधाळशी गोडी
चला बसा होडीमधे मजा करू थोडी

लुकुलुकु पोहतात
मासे चांदण्यांचे
कुठे कुठे लागतात
बेटही ढगांचे

आरामात पाहा सारे करू नका खोडी
चला बसा होडीमधे मजा करू थोडी

एरवी या सागराचे
पाणी काळेभोर
चांदोबाची होडी म्हणजे
उजेडाचा मोर

होडीला या जगामधे नाही कुठे जोडी
चला बसा होडीमधे मजा करू थोडी

- ग्लोरी