दुष्काळ

गेली संपून ही सुगी , आला कडक ऊन्हाळा
खाली झाली आढी , आता उरल्या कोयाळा

खाली झाले तळे , देठ सुकतो कमळा
गेली मरून मासळी , तप सोडीतो बगळा

गेली आटुन सरीता , खाली उरे खडकळा
खाली झाले कूप , गाळ उरलासे तळा

झाल्या रिकाम्या कणग्या , पोटामध्ये येई गोळा
उरे रिकामेच ताट , घरा आली अवकळा

गेली जळून हिरवळ , आता उडतो धुरळा
जाइ मरून गोधन , गिधाडा लागला डोहळा

झोप येईना भुकेने , श्वान करीती कोल्हाळा
पिंडदाने झाली खुप , आता थकला कावळा

हरीश दांगट

----------------
निवडक शब्दांचे अर्थ
---------------
आढी - आंबे पिकवीण्याची जागा
कोयाळा - आंब्यांच्या कोयी, कोयी वाळल्यावर भाजुन मधला भाग खाता येतो,
दुष्काळात काही लोक हे खाउन दिवस काढतात

खडकळा - खदकाळ
कणग्या - धान्य साठविन्यातयार केलेले लाकडी पिंप
कोल्हाळा - कोल्हेकूइ, कोल्हे किंवा कुत्री रात्री उठवतात तो गोंगाट
-----------------