देवापाशी मागणे (अभंग)

देवा तुजपाशी । एकची मागणे ।
माझे हे वागणे । सरळ ठेवा ।।

देवा तुजपाशी । मागतो मी भिक ।
राहु दे ना ठिक । सर्वकाही ।।

देवा माझा एक । पुरवावा लाड ।
आनंदाचे झाड । माझ्या दारी ।।

देवा माझे आता। पुरवावे कोड ।
नको मज खोड । वाईटाची ।।

देवा एक माझा । आहे अट्टाहास ।
नको हा आकस । कोणाचाही ।।

देवा द्यावा मज । एकची वर ।
नको मज डर । कशाचाही ।।

देवा मजलागी । आहे एक आस ।
सदा घ्यावा ध्यास । तुज चरणांचा ।।

मज आंधळयास। द्यावी एक काठी ।
सदा माझ्या पाठी । हात तुझा ।।

मज गरीबास । द्यावे काही ऋण ।
तुझी आठवण । रात्रंदिन ।।

देवा मजलागी । द्यावी एक भेट ।
जाउ दे ना थेट । गाडा जिवनाचा ।।

हरीश दांगट