तुझी नजर (तरही)

Submitted by मिल्या on 13 July, 2011 - 02:16

खोल खोल आतवर तुझी नजर
काळजास पाडते फिरून घर

कारणाविना कसा चढेल ज्वर?
खोल खोल आतवर तुझी नजर

घाव हा तुझा तसा जुनाच पण
आजही जखम तशीच... ओलसर

एक तर उधार चेहरा तुझा
त्यात लिंपले थरांवरून थर

सांग ना सुगंध हा लपेल का?
आणतो कुठूनही तुझी खबर

तप्त अन उजाड वाळवंट मी
दे तुझेच मेघ अन तुझीच सर

रंगहीन वस्त्र जीवना तुझे
दु:ख त्यावरी ... खरी कलाकुसर

घ्यायचे असेल तर कवेत घे
पण नकोत स्पर्श हे सटरफटर

मी तुला हवा तसा दिसेन पण
आरसा जरा स्वत:समोर धर

श्वास तो शिध्यासमान वाटतो
नवल काय जर असेल त्यांत खर

दु:ख फार तर असेल वीतभर
पाहिजे रुमाल मात्र हातभर

गुलमोहर: 
मराठी गझल
शब्दखुणा: 
गझल
मिल्या
शेअर करा

जबरदस्त...

घाव हा तुझा तसा जुनाच पण
आजही जखम तशीच... ओलसर

तप्त अन उजाड वाळवंट मी
दे तुझेच मेघ अन तुझीच सर

रंगहीन वस्त्र जीवना तुझे
दु:ख त्यावरी करे कलाकुसर

घ्यायचे असेल तर कवेत घे
पण नकोच स्पर्श हे सटरफटर

हे शेर फार्फार आवडले.

Submitted by डॉ.कैलास गायकवाड on 13 July, 2011 - 02:30

एक तर उधार चेहरा तुझा
त्यात लिंपले थरांवरून थर >>> सुंदर शेर!

रंगहीन वस्त्र जीवना तुझे
दु:ख त्यावरी करे कलाकुसर>>> छान!

घ्यायचे असेल तर कवेत घे
पण नकोच स्पर्श हे सटरफटर >>> वेगळा शेर! Happy

श्वास तो शिधा म्हणून वाटतो
नवल काय जर असेल त्यांत खर>>> पहिली ओळ फार आवडली.

धन्यवाद व अभिनंदन!

-'बेफिकीर'!

Submitted by बेफ़िकीर on 13 July, 2011 - 02:36

खूपच सुंदर गझल. सगळेच शेर आवडले. खूप सहज !!

सांग ना सुगंध हा लपेल का?
आणतो कुठूनही तुझी खबर

हा तर खूपच आवडला

Submitted by सांजसंध्या on 13 July, 2011 - 02:45

छान.. Happy

Submitted by मी मुक्ता.. on 15 July, 2011 - 08:07

कारणाविना कसा चढेल ज्वर?
खोल खोल आतवर तुझी नजर

घाव हा तुझा तसा जुनाच पण
आजही जखम तशीच... ओलसर

एकदम सही शेर !

एक तर उधार चेहरा तुझा
त्यात लिंपले थरांवरून थर

छान !

घ्यायचे असेल तर कवेत घे
पण नकोत स्पर्श हे सटरफटर

आवडला. Wink

Submitted by ज्ञानेश on 21 July, 2011 - 05:49

धन्यवाद परत एकदा

व्वा ज्ञानेशचा प्रतिसाद बघून छान वाटले... ज्ञानेश तुझ्या प्रतिसाद फार महत्वाचा असतो माझ्यासाठी तेव्हा विशेष धन्यवाद Happy

Submitted by मिल्या on 21 July, 2011 - 07:29