पाककृती स्पर्धा-१ - तिरंगी पदार्थ - सुशी आणि माकी रोल्स - अमितव

०. सुशी बनवायच्या २४ तास आधी सॅमन मासा फ्रीजर मधुन काढून फ्रीज मध्ये थॉ करायला ठेवा. हा घरातल्या तापमानाला किंवा गरम पाण्यात घालून थॉ करुन नये तर फ्रीज मध्ये काढून थॉ करावा असं म्हणतात.

आता रोल्स/ सुशी करायच्यावेळी:
१. निशीकी तांदुळ धुवून शिजवुन घ्या. हा चिकट तांदुळ असतो, त्यामुळे पाणी नेहेमीच्यापेक्षा कमी लागेल. राईस कुकर, आयपी, साधा कुकर कशातही शिजवा.
२. भात झाला की वाफ जिरायची वाट न बघता क्विक रिलीज करुन भात एका बाऊल मध्ये काढून घ्या. त्यात राईस व्हिनेगर घालून मिसळून घ्या/ सीझन करुन घ्या. याने भाताला सुशीला जी चव असते ती येते. शिवाय असं केल्याने बहुतेक भात अती जास्त चिकटत नसावा आणि हाताळायला सोपा पडत असावा.
३. आता भात थोडा निवतोय तोवर काकडी, अ‍ॅवकाडो, हवं असेल तर गाजर, हँडरोल करणार असाल तर अर्बची पानं ही चांगली लागतात तर ते सगळं धुवुन ज्युलिअन्स करुन घ्या.
४. फ्रीज मधुन मासा काढून पेपर टॉवेलने कोरडा करुन घ्या. किंचित दाबुन पाणी टिपलं की झालं.
५. आता या माशाचे तिरके तुकडे करुन घ्या. पहिला मोठा तिरका तुकडा बाजुला काढा. मग धारदार सुरीने जमतील तितके पातळ तुकडे करा. सॅमनला आडवे मसल्स (नक्षी) छान असते. जीवन सार्थकी लावायचं असेल तर ती नक्षी सुशी वर छान दिसली पाहिजे. टेक्निकली या कट्स ना काय म्हणतात, मसल्स मधुन अगेन्स्ट द ग्रिड कट करायचे का आणि कसे असे प्रश्न पडले तर गूगल करा. पण लक्षात ठेवा आपण स्टेक खाणार नाही आहेत. त्यामुळे फार डोकं चालवू नका.
६. आता पहिला काढलेला मोठा तुकडा सशीमी सशीमी करुन पटकन सोय सॉस/ वसाबीत बुडवुन कोणी बघायच्या आधी गट्टम करुन टाका.

माकी रोल्स

१. सुशी मॅट आडवी पसरवा. ती धुणे/ स्वच्छ करणे टाळायचं असेल तर त्यावर क्लिंज रॅप लावुन घ्या.
२. मॅटवर सीवीड शीट ठेवा. गुळगुळीत बाजू मॅटवर, खरखरीत वरच्या बाजूला.
३. आता हात पाण्याने ओले करुन भाताची मूद करा आणि सी-वीड शीट वर हळूहळू सपाट पसरवा. पूर्ण सीवीड शीट झाकायला मला साधारण दोन मुदी लागल्या. बर्‍यापैकी पातळ थर बनवा. माझा थोडा जाडच झाला, अजुन पातळ चालला असता.

४. आता काकडी, अ‍ॅवकाडो आणि मगाशी कापलेले मासे यांचे तुकडे भातावर ठेवा. मी प्रत्येकी दोन-तीन तुकडे असे दोन बाजू बाजूला दोन ढीग ठेवलेत.
५. आता मॅटच्या सहाय्याने माकी रोल वळत जा. लक्षात ठेवा आपल्यात ती मॅट खात नाहीत, त्यामुळे मॅट रोल-ओव्हर करायची आहे वळायची नाही. भाताच्या चिकटपणा मुळे बर्‍यापैकी सहज रोल वळला जातो. जमेल तितका घट्ट वळा. हे अजिबात कठीण नाही.
६. आता रोलच्या दोन्ही बाजूंनी काही बाहेर आलं असेल तर भाताला चिकटवून आत ढकलायचा माफक प्रयत्न करा. आठवा: सुशी प्लेसला मिळणार्‍या रोल्स मधले बाजूचे रोल्स यथातथाच वळलेले असतात, आणि आपण तर सुशी शेफ पण नाही!
७. आता धारदार सुरी घेऊन त्या एक सापाचे आठ तुकडे करा. लक्षात ठेवा: डिव्हाईड अ‍ॅड काँकर!
म्हणजे आधी मध्यभागी कापून एकाचे दोन सारखे रोल करा. मग त्या दोन रोल्सच्या मध्यभागी कापा म्हणजे चार रोल्स होतील. मग चाराचे आठ करा. असं केल्याने रोल्स बर्‍यापैकी एकसमान दिसतात.
८. आता हे रोल्स, एका छोट्या बोट मध्ये/ वाटीत सोय सॉस आणि झेपेल तितकं वसाबी एकत्र करुन बरोबर पिकल्ड आल्याचे काप देऊन सर्व करा.
सुशी:
ही करायला अत्यंत सोपी आहे.
१. हात ओला करुन लहान लिंबाच्या आकाराचा गोळा हातात घ्या. आता या भाताला मुटकुळं करतात तसा आकार द्या. निमुळता लंबगोल.
२. आता हा प्लेट मध्ये ठेवा आणि त्याच्यावर माशाचा एक तुकडा ठेवा.
३. हे दोन्ही, आता तळहातावर घेऊन अंगठा आणि तर्जनीची टोक एकमेकांना जोडून ओके इमोजी करतात तशी करा आणि यावरुन दोन-तीन वेळा अलगत फिरवा म्हणजे जरा चांगला आकार येईल. हे फार बोरिंग वाटलं (जे मला वाटलं) तर स्किप मारा, आणि वरुन माश्याचा तुकडा जरा दाबुन बसवा. तो मासाच इतका सुंदर दिसतो की बस! आणि तसाही भात झाकलाच जातो.
झालं! तय्यार!

व्हेजी रोल्स

१. घरात व्हेजी लोकं असतील तर हे आनंदाने करा. माशात वाटेकरी जितके कमी तितकं चांगलंच ना!
२. यात माकी रोल्सच करायचे फक्त मासा घालायचा नाही की झालं.

३. काकडी, अ‍ॅवकाडो, रताळं (रताळं डाऊन मार्केट वाटत असेल तर स्वीट पटेटो म्हणा) याचे चांगले लागतात.