डायनामाइट श्रिंप

इथे बर्‍याच रेस्टॉरन्ट्स मधे डायनामाइट श्रिम्प या नावाची लोकप्रिय डिश आहे. काही ठिकाणी बँग बँग श्रिम्प, फायरक्रॅकर श्रिम्प असंही म्हणातात.
माझ्या मुलांची भारीच फेवरीट डिश त्यात सध्या बराच निवांत वेळही हाताशी असल्यामुळे तशीच रेसिपी घरी बनवण्याचा प्रयत्न केला, जो बर्‍यापैकी यशस्वी झाला म्हणून इथे देतेय. सोपी आहे ही रेसिपी.
डायनामाइट सॉस -
खरं तर नावावरून वाटला तरी फार तिखट वगैरे नसतो हा सॉस. क्रीमी, चटपटीत, आंबट, तिखट अशी चव असते. तर एका बोल मधे मेयो, स्वीट चिली सॉस, सिराचा सॉस हे नीट मिक्स करून घ्या. झाला सॉस तयार. तो बाजूला ठेवून द्या.
श्रिंप
३० मिनिट हा करण्याचा वेळ दिला असला तरी श्रिंप आधी थोडा वेळ तरी ( १-२ तास) मॅरिनेट केले म्हणजे चव छान मुरते. श्रिम्प फ्रोझन असतील तर थॉ करून घ्या. एका बोल मधे १ अंडे फोडून थोडेसे फेटा. त्यात सोया सॉस आणि २ चिमूट मिरपूड घाला. सोया सॉस असल्यामुळे वेगळ्या मिठाची गरज नाही. लसणाच्या १-२ पाकळ्या किसून घातल्या तरी चालतील - ऑप्शनल. या मिश्रणात श्रिंप घालून तास दोन तास ठेवावे.
एका उथळ भांड्यात किंवा ताटलीत कॉर्न स्टार्च आणि ऑल पर्पज फ्लार चे मिश्रण आणि किंचित मीठ घालून व्यवस्थित हलवून पसरून घ्या.
दुसर्‍या बाजूला कढईत तेल तापयला ठेवा. श्रिंप मिश्रणातून निथळून काढून दोन्ही बाजूने या कोरड्याच पिठात बुडवून जरासे झटकून मग कढईत सोनेरी रंगावर तळून घ्या. किंवा दोन्ही बाजूने नीट शॅलो फ्राय केले तरी चालतील. तळून झाल्यावर पेपर नॅपकिन वर ठेवले की जास्तीचे तेल निथळून जाईल.

हे तयार श्रिंप ताटलीत हवे तसे अरेन्ज करून वरून त्यावर चमच्याने सॉस एकसारखा ओता. (काही रेसिपीत बोल मधे हे श्रिंप आणि सॉस घालून टॉस करा असे लिहिलेय पण मला पूर्ण ओल्या श्रिंप पेक्षा वरून घातलेले जास्त आवडले.) जास्त स्पायसी आवडत असेल तर थोडा एक्स्ट्रा सिराचा सॉस शिंपडा. भाजलेले तीळ, बारीक चिरलेली कांद्याची पात वरून घातली तर दिसायला छान दिसते आणि चवीत पण भर पडते. हे एक मस्त आणि करायला, खायला सोप्पे असे अ‍ॅपटायजर होते.