ऱ्हुबार्बचे आंबटगोडतिखट तोंडीलावणे आणि सरबत

ऱ्हुबार्बची देठं धुवून, पुसून, चिरून घ्या. साधारण अर्ध्या इंचाच्या फोडी चालतील. फार बारीक चिरायची आवश्यकता नाही.
सहसा ऱ्हुबार्बच्या चार कप फोडींना एक कप साखर आणि अर्धा कप पाणी किंवा रेड वाइन व्हिनिगर लागतं. मी पाणीच घातलं यावेळी.
तसंच चार कप फोडींना एक टीस्पून आल्याचा रस घाला.
हे सगळे जिन्नस मोठ्या जाड बुडाच्या भांड्यात एकत्र करून मध्यम आचेवर शिजवा. अधून मधून परतत रहा.
ऱ्हुबार्ब शिजायला फार वेळ लागत नाही. पाचेक मिनिटांत फोडी मऊ व्हायला लागतील. त्या मॅशरने मॅश करत जा.
पाणी आळून मिश्रण छान मिळून आलं की गॅस बंद करा.
आता त्यात चवीप्रमाणे मीठ, तिखट आणि जिऱ्याची पूड घाला.
पूर्ण गार झालं की बाटलीत भरा.
चवसुद्धा बघण्याआधी फोटो काढून फेसबुकवर टाका.
'फीलिंग ऱ्हुबार्बी' किंवा तत्सम क्याप्शन द्या.
मग चव बघून तिखटमीठ ॲडजस्ट करा.

आणि हे र्‍हुबार्बेड :

चार कप र्‍हुबार्बच्या फोडींना प्रत्येकी एक कप साखर आणि पाणी घालून शिजवा आणि मग मिश्रण बारीक गाळणीने गाळून घ्या. आयत्या वेळी पाणी किंवा सोडा (आणि/किंवा वोडका किंवा टकीला) घालून प्या.
गाळून उरलेले फायबर्स दह्यात, आइस्क्रीमवर, पॅनकेक्सवर घालून खायला सुंदर लागतात आणि दिसतात - वाया जात नाहीत.