कॉर्न चाट

Submitted by मंजूडी on 26 February, 2015 - 04:15
प्रत्यक्षात लागणारा वेळ: 
२० मिनिटे
लागणारे जिन्नस: 

स्वीट कॉर्नचे दाणे - २ वाट्या
बेबी कॉर्नचे १ से.मी. आकाराचे क्यूब्स - १ वाटी
पनीरचे १ से.मी. आकाराचे क्यूब्स - अर्धी वाटी
काजू - अर्धी वाटी
धने - १ चमचा
जिरे - २ चमचे
बडिशेप - २ चमचे
४-५ लवंगा
इंचभर दालचिनीचा तुकडा
२ लिंबं
मीठ
अमूल बटर - तीन चार चमचे
लाल तिखट - ऐच्छिक
आवडीप्रमाणे चीज

क्रमवार पाककृती: 

१. जमलं तर, वेळ मिळाला तर काजू अर्धे अर्धे करून दोन तास पाण्यात भिजवून घ्या. ह्याची चव छान वेगळी लागते.
२. स्वीट कॉर्नचे दाणे आणि बेबी कॉर्नचे क्यूब उकडून घ्या.
३. पनीरचे तुकडे पाण्यात घालून ठेवा.
४. धने, जिरं, बडीशेप, लवंगा, दालचिनी न जळू देता खमंग भाजून घ्या. जरा कोमट झाल्यावर मिक्सरमध्ये बारीक पावडर करून घ्या.
५. एका कढईत अमूल बटर वितळवून त्यात उकडलेले स्वीट कॉर्नचे दाणे, बेबी कॉर्न घाला. काजू पाण्यातून निथळून काढून त्यात घाला. चवीप्रमाणे मीठ आणि तयार केलेली ताजी मसाला पावडर घाला. तिखटपणासाठी हवं असेल तर लाल तिखट घालून व्यवस्थित ढवळा. पनीरचे तुकडे घालून नाजूकपणे पनीर मोडू न देता ढवळा. वरून लिंबाचा रस पिळून नीट एकत्र करून गरमागरम खायला घ्या.

corn chat.jpg
वाढणी/प्रमाण: 
दोघांसाठी; पण एकच माणूस संपवतो.
अधिक टिपा: 

१. हे चाट नुसतंही खाता येतं, मी घरी केलं होतं तेव्हा कॅनॅपीजमध्ये भरून वरून थोड्डंसं चीज किसून घालून खायला दिलं होतं.
२. लिंबांची काटकसर करू नका. चाटची चव लिंबूरसामुळे खुलून येते.
३. मी ज्या लग्नात हे सर्वप्रथम खाल्लं होत तो आचारी MDH ची धनिया पावडर, जीरा पावडर आणि डेगी मिर्च पावडर घालत होता. लवंग, दालचिनी, बडीशेपेची कल्पना माझी आणि मला ती चव आवडली.

माहितीचा स्रोत: 
एका लग्नातला इंदोरी चाटवाला
आहार: 
शाकाहारी
पाककृती प्रकार: 
उपाहार
चटणी, कोशिंबीर, लोणचे
शब्दखुणा: 
चटपटीत
कॉर्न चाट
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

मसाला मस्त वाटतोय! फोटो पाहिजे..

लगेच हवं असेल तर मी फ्रोजन कॉर्न खरपुस भाजुन घेते.. मग टोमॅटो,कांदा,धने-जिरे पुड ,चाट मसाला नि कोथिंबीर.. १० मिनीटात तय्यार!!

Submitted by चना@12 on 26 February, 2015 - 04:30

कॉर्न चाट म्हटलं की कांदा टोमाटो शेव चाट मसाला वालं आम्हा गरीबांचं पोटभरू चाट समोर येतं. यात काजू आणि पनीर शिवाय नुकताच केलेला गरम मसाला असल्याने नियमानुसार याचं नाव "शाही कॉर्न चाट" ठेवायला हवं.
*खरंच, म्हणजे मस्त पार्टीचे मेनू सांगतानाही या पदार्थाचं नाव अदबीनं घेतलं जाईल. Happy

Submitted by आशूडी on 26 February, 2015 - 05:03

है शाब्बास! फोटो नसूनही रेसिपी तत्परतेने टाकल्याबद्दल धन्यवाद :). ( दम द्यायला विसरलीस का? Wink )
रेसिपी लवकरच करून बघेन Happy

Submitted by संपदा on 26 February, 2015 - 06:58

मी पण गरीबाचं पोटभरू चाटच खाल्लंय. हे 'इंदौर्की शाही चाट' नक्की करणार.
मंजूडी, गरमागरम द्यायचं म्हणजे ५व्या स्टेपला बटर वितळल्यावर सगळ मिसळेपर्यंत gas चालूच ठेवायचा ना.

Submitted by अमितव on 26 February, 2015 - 08:38

वेगळी आणि मस्तं पाककृती आहे.

चाट म्हंटल्यावर धने, बडीशोप, लवंग, दालचिनी घालायचं डोक्यात येत नाही. हे घालून करून बघेन.

Submitted by मृण्मयी on 26 February, 2015 - 10:28

पनीरचे तुकडे का भिजवत ठेवायचे? त्याने ते लवकर मोडतील असं वाटतं.
रेसिपी मस्त आहे.

Submitted by सायो on 26 February, 2015 - 10:41

paneer che tukade fresh rahave mhanun panyat thevataat.
aamhI ghari paneer aanale ki panyat ghalunch freeze madhye thevato nehemi.

chat aawadali.

Submitted by अल्पना on 26 February, 2015 - 23:33

पनीरचे तुकडे का भिजवत ठेवायचे?>> थॉ करण्यासाठी सायो Wink आणि अल्पना +१.
पनीर न घालून चवीत काही फरक पडणार नाही. पण मधून तोंडात पनीर/ काजू येणं आवडलं होतं.

अमित, हो! सगळं नीट एकत्र होईपर्यंत गॅस चालू ठेवायचा.

Submitted by मंजूडी on 26 February, 2015 - 23:48

बर.

Submitted by आशूडी on 27 February, 2015 - 00:39

वाह...मस्तच लागेल. नुसते वाचूनच छान वाटले.
मंजूडी धन्स ग...एक वगळीच झट की पट होणारी रेसिपी सुचवल्याबद्दल...

Submitted by Mo on 27 February, 2015 - 00:49

दोन लिंबं पाहून जरा शंका आली होती, पण <लिंबांची काटकसर करू नका. चाटची चव लिंबूरसामुळे खुलून येते.> हे पटलंच. लिंबात काटकसर नकोच.

मस्त आहे प्रकार! (कॅनपीज मिळाल्या की) करणार नक्कीच.

आपल्याकडे 'कॉर्न फॅन क्लब' आहे का? नसेल, तर काढूया का? Happy

Submitted by पूनम on 27 February, 2015 - 01:01

Pages