आता काय शिकवावे?

गेल्या वर्षात काय शिकलो याचा मागील २-३ दिवस लेखाजोखा घेणं चालु होतं. नविन पुस्तकं वाचली (तीही इंग्रजी- त्यामुळे समजायला जरा वेळच लागला). मायबोलीवरचे चांगले लेख वाचले. आता बरच शिकुन (म्हणजे degree च्या भाषेत) झालय, पण अजुनही असं वाटतं, की महत्त्वाचं असं आपण काही शिकलोच नाही की जे रोजच्या जीवनात कामात पडेल.

अजुनही कोणी घर घेणं म्हणजे investment म्हटलं की Rich Dad poor Dad आठवते आणि घर घेणे liability वाटते. अर्थशास्त्राचा अजुनही अर्थ कळत नाही. stress management, time management कितीही वाचलं तरी कळत नाही, आणि ते वाचुन करण्यासारखं नसावं, ते करावं लागतं, हे महत्त्वाचं. असो.

एकुण काय, हे शाळेत/ कॉलेजमध्ये शिकवलं असतं, आनि करवुन घेतलं असतं तर बरं झालं असतं असं वाटतं.{माणूस मूळात आळशी आहे,असं कुठतरी वाचलं होतं, ते माझ्यावरच लिहिलय की काय म्हणुन चपापलो होतो} म्हणजे पालक स्वस्त आणि ताजा कसा आणायचा हे अजुनही जमत नाही. सोन्यात (म्हणजे दागिण्यात - इति सौ.) गुंतवणुक करावी तर सोनं घ्यावं का नाही हेच कळत नाही. पुन्हा Rich Dad Poor Dad मधली रॅट रेस आठवते, अन मीच तो उंदीर असल्याचा भास होतो.

मुलांचं संगोपन करणे हे अतिकठीण काम. ते कुठे शिकवल्या जात नाही का हो? मग मुलं मोठी होतील, पुढे त्यांना या रेसमध्ये न दौडवता जगण्याचा आनम्द कसा घ्यायचा हे ही शिकवायला हवं, पण जे स्वत:लाच जमत नाहि ते इतरांना कसं सांगणार.....अश्या अनेक गोष्टी आहेत, ज्या न शिकल्याने प्रचंड त्रास झाला, तो वाचवता आला असता.

शाळा कॉलेजात इतर विषयांसोबत हेही शिकवलं असतं तर बर झालं असतं नाही?