जेवणानंतर काही गोडधोड - चायना ग्रास मसाला टॉवर्स

मारी बिस्किटे मिक्सरमधून बारीक करून घ्या. त्यात रूम टेंपरेचरला आणलेलं अमुल बटर थोडंथोडं करत मिक्स करता. बिस्किटांच्या चुर्‍याचा लाडू वळता आला की बटर घालणं बंद करा.

तीनही कपकेक मोल्ड्सना आतून बटरचा एक हात लावा आणि तळाशी केक स्प्रिंकल्स घाला. या स्प्रिंकल्सवर बिस्किटाच्या मिश्रणाचा एक थर द्या. पातळ चालेल फार जाड नको. (बिस्किटाचे तीन आणि चायनाग्रासचे दोन असे एकूण पाच थर एकूण असणार आहेत.) हे मोल्डस फ्रीजमध्ये ठेवा.

तीन बोलमध्ये तीनही प्रकारचे मसाले थोडे थोडे घाला. हवंतर बाऊल वेगवेगळ्या रंगाचे घ्या म्हणजे गोंधळ होणार नाही. नाहीतर चाखून पहायची सोय आहेच.

आता एका सॉसपॅनमध्ये एक कप दूध घेऊन ते उकळे पर्यंत गरम करा. त्यात स्ट्रॉबेरी फ्लेवरचे दोन चमचे चायना ग्रास घालून मिश्रण घट्टसर होईपर्यंत ढवळा. गॅसवरून खाली काढून थोडं गार होऊ द्या. मध्ये मध्ये ढवळत रहा नाहीतर ते सेट होईल. जरा गार झालं की वरील तीन मसाल्यांच्या बोल्समध्ये थोडं थोडं घालून मसाला आणि ते मिश्रण चांगलं एकत्र करा. फ्रीजमधून तीन मोल्डस काढून त्यात एका मोल्डमध्ये एक मसाला या तत्वानुसार या तीन वेगवेगळ्या चायनाग्रासचा थर द्या.

इथे पुन्हा कोणत्या मोल्डमध्ये कोणत्या मसाल्याचा थर दिला आहे हे लक्षात ठेवा. या थरावर अजून दोन बिस्किटाचे आणि एक चायनाग्रासचा थर येणार आहे हे लक्षात ठेवा. पुन्हा हे मोल्डस फ्रीजमध्ये जाऊ द्यात.

दोनेक मिनिटांत चायना ग्रास सेट होईल. मग हे मोल्डस काढून त्यात एक बिस्किटांचा थर द्या की पुन्हा रवानगी फ्रीजमध्ये!

आता दुसर्‍या सॉसपॅनमध्ये उरलेलं एक कप दूध उकळवून व्हॅनिला फ्लेवरचं चायना ग्रास घाला. आधीच्याप्रमाणे मिश्रण दाटसर झाल्यावर खाली उतरवा. पुन्हा वेगळे तीन बोल्स तीन मसाले घालून तयार ठेवा आणि थोडंथोडं व्हॅनिला चायना ग्रास त्या बोल्स मध्ये घाला आणि एकत्र करा. मोल्ड्स काढून त्यात आधीच्या वेलची स्ट्रॉबेरीच्या बोलमध्ये वेलची व्हॅनिला फ्लेवर, दालचिनी मध्ये दालचिनी आणि जायफळात जायफळ असे चायनाग्रासचे दुसरे थर द्या.

पुन्हा दोन मिनिटांकरता फ्रीज दाखवून आणा आणि मग शेवटचा बिस्किटांचा थर देऊन फ्रीजमध्ये पाठवणी करा.

आयत्यावेळेस एक पातळ सुरी मोल्डसच्या आतील कडांवरून फिरवून हलकेच सोडवून घ्या. आणि प्लेटमध्ये आपटून काढा. चायना ग्रास मसाला टॉवर्स तय्यार!

हे साहित्य. केशरी बोलमध्ये मारी बिस्किटांचा चुरा आहे.

हे मारी बिस्किटांचा चुरा आणि बटर यांचं मिश्रण :

तीन प्रकारचे मसाले - वेलची, जायफळ आणि दालचिनी

हे मोल्ड्स. उंचीचा अंदाज येण्याकरता :

मोल्डमध्ये केक स्प्रिंकल्स घालून आणि मग बिस्किट+बटर चा थर देऊन :

स्ट्रॉबेरी फ्लेवर चायना ग्रास, सॉसपॅनमध्ये :

तीन मसाल्यांच्या तीन बोल्समध्ये चायना ग्रास :

तयार चायना ग्रास मसाला टॉवर्स :