मानवाधिकारांना वंचित झालेली बलुचिस्तानची जनता!

हा लेख आणि त्यावरचे प्रतिसाद ह्यांमुळे खर नविन खूपच माहिती समजली. सुधीर काळे, बाजो, अर्पणा मनापासून आभारी आहे.

येस , काळेजी आपण म्हणता ते बरोबर आहे. गिलगिट बाल्टिस्तान आता भारतात येणे मला तरी शक्य वाटत नाही. इव्हन आझाद काश्मीर व गिलगिट बाल्टीस्तानात सार्वमत घेतले तरी ते भारताच्या किंवा पाकिस्तानच्या बाजूने लागण्याची शक्यता नाही. ह्या मंडळीनी जगच पाहिलेले नाही तर आपण किती व्हल्नेरेबल आहोत हे त्याना कुठे माहीत आहोत. त्यामुळे ते आम्हाला स्वतंत्र देश म्हणूनच रहायचे आहे असाच कौल देणार ! (हरिसिन्गाने तरी काय केले होते). विहीर हेच जग आहे असे मानणार्‍या कूपातल्या मंडूकाप्रमाणे ते विचार करणार.

विषय बलुच्यांच्या मानवी हकांचाच चालू आहे पण मुळात बलुच्यांचे का प्रश्न आहेत हेच (माझ्यासकट)बर्याच जणांनी अभ्यासलेले नव्हते त्यामुळे अर्पणा मदतीला धावल्या व विषय वेगळ्या दिशेला गेला पण ते आवश्यकच होते.
पण मरेनात का ते बलोची. नाहीतरी पाकिस्तानी म्हणून ते आपले शत्रु आहेतच असे म्हणून हा विषय सोडून देता येणार नाही हेही खरेच.

(रच्याकने, बलुचिस्तान आसिन्धु सिंधु मध्ये येत नाही असे दिसते . मग त्याला अखन्ड भारतात स्थान द्यायचे की नाही? :))

>>> >>खरे खोटे देव जाणे, पण भारत बलुचींना 'भडकवतो' असा आपल्यावर नेहमीच आरोप होत असतो. त्याबद्दलही >>माहिती मिळवीत आहे.
शत्रूपक्षातल्या असंतुष्टांना भडकवणे हा राजकारणाचा भागच आहे. उलट हे होत नसेल तरच आश्चर्य.

भारत बलुची व पख्तून फुटिरांना नक्कीच छुपी मदत करत असणार. 'जिये सिंध्'च्या कार्यकर्त्यांना देखील भारताची आर्थिक मदत असणार. अफगाणिस्तानातल्या पंजशीर खोर्‍यातल्या नॉर्दर्न अलायन्सच्या अहमदशहा मसूद या धडाडीच्या ताजिक नेत्याला व त्याच्या टोळीला २००१ पर्यंत भारत शस्त्रास्त्रे व इतर सर्व तर्‍हेची मदत देत होता, कारण मसूदचे व तालिबानचे हाडवैर होते. मसूदच्या ताब्यातील अफगाणिस्तानचा अंदाजे १० टक्के प्रदेश कधीही तालिबानला मिळविता आला नाही. उरलेला ९० टक्के अफगाणिस्तान २००१ पर्यंत तालिबानच्या ताब्यात आला होता. हा अहमदशहा मसूद रशियन आक्रमणाच्या वेळी (१९७९-१९८८ या काळात) लादेनचा जवळचा मित्र होता व दोघे एकत्र रशियाशी लढले होते. १९९६ नंतर तालिबान व अलकैदा एकत्र आल्याने लादेनला मसूदशी शत्रुत्व घ्यावे लागले. २००१ मध्ये ९/११ च्या केवळ २ दिवस आधी एका पत्रकाराच्या वेषात आलेल्या एका तालिबानी आत्मघातकी हल्लेखोराने स्वतःबरोबर मसूदला उडवून दिले होते.

सुदैवाने अर्पणा आलयामुळे आणि इतराना काश्मीर सोडून इतरत्र इन्टरेस्ट नसल्याने ते न आल्या मुळे ; बीबी 'वाचला' आहे

अफगाणिस्तान आणि इराणशी भारताचे सोहार्द्याचे संबंध आहेत. बलुचिस्तानची निर्मिती या दोन्ही देशांना डोकेदुखी ठरणार असल्याने भारताचा बलुचिस्तानला सध्यातरी पाठिंबा नाही. बलुची लोकांची एकपण संस्था भारतात नाही जशी तिबेटच्या लोकांची आहे. बलुची लोकांच्या संस्था अमेरिकेत आहेत.

चीनने पाकिस्तानला ग्वादर बंदर बांधून दिले आहे आणि त्याबदल्यात चीन पाकिस्तानमधून आपल्या प्रांतापर्यंत तेलवाहिनी बांधणार आहे. इथे अमेरिकेचे आणि भारताचे हितसंबंध जुळतात कारण अरब समुद्रातला चीनचा नाविक तळ भविष्यात भारताच्या आणि अमेरिकेच्या तेलपुरवठ्यावर परिणाम करू शकतो. तसेच इराणमधून पाकिस्तान आणि भारताला जोडणारी तेलवाहिनी बांधण्याचा प्रस्ताव आहे. इराणशी वैर असल्याने अमेरिकेला त्यालादेखील खोडा घालायचा आहे. तसेच अमेरिकेला स्वतःची मध्य आशियातून अफगाणिस्तान आणि बलुचीस्तानातून तेलवाहिनी बांधायची आहे.

जर का आता पाकिस्तानात अराजकता माजली तर हे सर्व प्रकल्प बंद पडतील. त्यासाठी आता बलुची लोकांचा मानवी हक्काचा प्रश्न आणि त्यांच्या स्वातंत्राच्या मागणीला अमेरिकेकडून खतपाणी मिळतंय. तसेच अमेरिकेचे drone विमानांचे हल्ले पाकिस्तानच्या सीमावर्ती भागात निरपराध जनतेला collataral damage च्या नावाखाली मारतायत त्यामुळे लोकात पाकिस्तान सरकारविरुद्ध असंतोष वाढतोय.

हा अमेरिकेचा प्लान ध्यानात घेऊन चीनने विकासाच्या बुरख्याखाली पाकव्याप्त काश्मीर ताब्यात घेण्यास सुरुवात केली आहे जसा रशियाने दुसर्या महायुद्धात पोलंडचा कब्जा केला होता. आता पाकिस्तान हा अमेरिका आणि चीन या महासत्ताच्या कात्रीत सापडलेला देश आहे. ज्याप्रमाणे जर्मनी, कोरिया, काश्मीर यांची फाळणी झाली त्याचप्रमाणे आता पाकिस्तानचा नंबर आला आहे.

काश्मीरमध्ये सुदैवाने तेलसाठे नाहीत, नाहीतर काश्मीर मधल्या लोकांचा मानवी हक्कांची सुद्धा चर्चा झाली असती.:स्मित:

आं? हे आणखी काही वेगळेच... आताशा रंग भरू लागला आहे बीबीत

पाकिस्तानात अस्थिरता असणे किंवा पाकिस्तान दुबळा होणे हे भारताला तोट्याचे ठरेल असे इथे काही जणांचे मत आहे. त्यामागचे कारण समजले नाही. याउलट पाकिस्तानचे तुकडे होऊन २-३ अजून नवीन देश निर्माण झाले (बलुचिस्तान, सिंध, पख्तुनिस्तान वगैरे) तर आताचा पाकिस्तान अत्यंत दुबळा होईल व नवीन तुकडे आपापसात भांडत राहतील. असे होणे भारताच्या फायद्याचे ठरेल असे वाटते.

मास्तुरे तुम्ही जे नेहमी विचार मांडता ते जे स्कूल आहे त्यांचे हे आवडते स्वप्नरंजन आहे.सध्या पाकिस्तानात जे सरकार आहे ते किमान लोकशाहीचा तोंडदेखला डोलारा बाळगून तरी आहे. तसे आंतराष्ट्रीय प्रोटोकॉलही ते पाळतात. भारताप्रमाणे पाकिस्तानत लोकशाही यावी अशी आस तिथल्या सामान्य लोकांत आहे.विचारवन्तात आहे. फक्त लष्करी अधिकार्यांत आणि त्यांच्या कलाने चालणार्‍या काही पुढार्‍यात नाही. उपखन्डातील सगळे आक्रमक खैबर खिंडीतूनच आले होते हे लक्षात ठेवले पाहिजे. १९८० च्या दरम्यान रशिया जेव्हा अफगाणिस्तानात घुसून बसला होता तेव्हा काहीतरी निमित्त काढून तो प्रथम पाकिस्तानात व नन्तर भारतात घुसण्याची भीती काही निरीक्षकाना वाटत होती. तेव्हा तर भारत आणि पाकिस्तानने एक संयुक्त फेडरेशन स्थापन करावे असा विचार दोन्ही देशातील विचारवन्तानी मांडण्यापर्‍यन्त मजल गेली होती. म्हणजे परिस्थिती किती टोकाला केली होती. ग्लासनोस्त आणि पेरिस्त्रोइका आल्यावर रशियाचेच तुकडे झाले व ते संकट टळले ... त्यामुळे आजचे पाकिस्तानचे संकट हे उद्या भारताचे संकट असेल हे भौगोलिक सत्य नेहमी लक्षात ठेवले पाहिजे.
नाही म्हटले तरी आजचे पाक सरकार हे आंतरराष्ट्रीय करार मदार/ प्रोटोकॉल्स याना जबाबदार आहे. म्हणून अण्वस्त्रे असूनही पाक ती आपल्या विरुद्ध वापरू शकत नाही. पण उद्या पाकमधले हे मरतुकडे सरकार जाऊन तालिबान्यासारख्या माथेफिरू अतिरेक्यांची सरकारे जर पाकिस्तानात आली तर पाकिस्तान अफगाणिस्तानसारखा बेचिराख तर होईलच पण पाकिस्तानी अन्वस्त्रे त्यांच्या हाती पडणार आहे त्याचे काय? दहशतवाद्यांच्या हिट लिस्टवर असलेल्या मशिद पाडणार्‍या काफिरांवर म्हणजे भारतावर हे अतिरेकी बेछूटपणे अण्वस्त्रे वापरण्याची शक्यता नाही काय?
तालिबानीनी कराचीच्या पाकिस्तान नेव्हल सर्व्हिसच्या पी एन एस मेहरान या तळावर हल्ला करून त्याची चुणूक दाखवलीच आहे...
भारत पाक अनेक वेळा झालेल्या तणावाच्या प्रसंगी बरेचसे ताळ्यावर राहून एका मर्यादेत रिअ‍ॅक्ट झालेले आहेत पण पाकिस्तानातली अण्वस्त्रे धर्मवेड वगळता कोणताही विधिनिषेध न बाळगणार्‍या 'चुकीच्या हातात' जाण्याच्या शक्यतेने भले भले टरकलेले आहेत . आपण तर त्यांचे पहिले 'गिर्‍हाईक ' असणार आहोत.

भारत्-पाकिस्तान युद्ध ऑक्टोबर १९४७ - जीनांचं सिव्हिलियन सरकार
भारत्-पाकिस्तान युध्द एप्रिल १९४८ - जीनांचं सिव्हिलियन सरकार
पाकिस्तानतली पहिली निवडणूक - श्रेय जनरल याह्या खान, निवड्णूकीत पूर्व्-बंगाल ला मताधिक्य, अनअ‍ॅक्सेप्टेड बाय भुट्टो ( सिव्हिलियन राजकारणी ).
इंडस वॉटर ट्रिटी , जी अजूनपर्यंत चालू आहे- १९६० च्या दशकात श्रेय अयुब खान ( आर्मी रूल )
१९८९ नंतर कश्मिर दहशदवाद - सिव्हिलियन सरकार
कारगिल युद्ध - नवाझ शरिफ, सिव्हिलियन सरकार

१९६५ युद्ध - अयुब खान ( आर्मी रूल )
पंजाब दहशदवाद-झिया ( आर्मी रूल)
उल्फा सपोर्ट्-आय एस आय ( आर्मी)

इतिहास बघता पाकिस्तानमधली तथाकथित लोकशाही सरकारं काही भारताच्या दृष्टीनं काही विशेष चांगली म्हणता येत नाहीत. मित्रराष्ट्र बळकट असल्यास उत्तम पण शत्रु राष्ट्र स्टेबल आणि स्ट्राँग असल्याचे फायदे कमी आणि तोटे जास्त.

तरीही बांग्लादेशनिर्मितीला पाठिंबा आणि पाकिस्तानच्या इतर भागातल्या असंतोषाला पाठिंबा देणं यांत खूप फरक आहे. या दोन भागांतल्या मूळ संस्कृतीत खूप फरक आहे. बलुचिस्तान, पख्तुनवाला इ. भागांत टोळ्यांशी असलेली लॉयल्टी आहे...सरकार किंवा विचारधारेशी नाही. अगदी अफगाणिस्तानात सुद्धा असच आहे.त्यामुळे शाही जिगरा ( टोळ्यांच्या सरदारांचा पाठिंबा विकत घेणे )असले प्रकार पाकिस्तान सरकारसुद्धा करतं. या टोळ्यांना मदत करता करता अजून एखादा लादेन तयार होणं जगाला परवडणार नाही. वेगळी राष्ट्रं तयार होण्यापेक्षा आतल्याआत वचक राहिल इतका पाठिंबा ठिक आहे.

बा.जो.,

१.
>> मास्तुरे तुम्ही जे नेहमी विचार मांडता ते जे स्कूल आहे त्यांचे हे आवडते स्वप्नरंजन आहे.

हे स्वप्नरंजन नसून वस्तुस्थिती आहे. पाकिस्तान एकसंध राष्ट्र कधीच नव्हता. पाकी सैन्यात सदैव पंजाबी अधिकार्‍यांचेच वर्चस्व का असते? याचा अर्थ उघड आहे. जरा जरी इतर लोकांना (सिंधी, बलुची, पठाण) संधी दिली तर ते वेगळी चूल मांडतील.

२.
>> सध्या पाकिस्तानात जे सरकार आहे ते किमान लोकशाहीचा तोंडदेखला डोलारा बाळगून तरी आहे. तसे
>> आंतराष्ट्रीय प्रोटोकॉलही ते पाळतात.

असली लोकशाही भारताच्या काय डोंबलाच्या कामाची? सदैव शस्त्रसंधीचे उल्लंघन करायला मागेपुढे न पाहणारे म्हणे आंतरराष्ट्रीय प्रोटोकॉल पाळतात. आणि शत्रूने कुठलातरी प्रोटोकॉल पाळल्याने भारताचा काय घंटा फायदा होतो?

३.
>> भारताप्रमाणे पाकिस्तानत लोकशाही यावी अशी आस तिथल्या सामान्य लोकांत आहे.विचारवन्तात आहे.

पाकिस्तानातल्या सामान्य लोकांना काळं कुत्रं तरी विचारतं का? नाहीना? मग भारतीयांनी का म्हणून त्यांच्या नावाने स्वत:चे ऊर बडवावे?

४.
>> उपखन्डातील सगळे आक्रमक खैबर खिंडीतूनच आले होते हे लक्षात ठेवले पाहिजे.

१९६५ चे युद्ध पंजाबातही झाले होते. पानिपतानंतर गेल्या २५० वर्षांत खैबरमधून आक्रमण झालेले नाही. मात्र खैबरचा मुद्दा पटला. त्यासाठी भक्कम राजनैतिक उपाय योजला पाहिजे.

५.
>> १९८० च्या दरम्यान रशिया जेव्हा अफगाणिस्तानात घुसून बसला होता तेव्हा काहीतरी निमित्त काढून तो
>> प्रथम पाकिस्तानात व नन्तर भारतात घुसण्याची भीती काही निरीक्षकाना वाटत होती. तेव्हा तर भारत
>> आणि पाकिस्तानने एक संयुक्त फेडरेशन स्थापन करावे असा विचार दोन्ही देशातील विचारवन्तानी
>> मांडण्यापर्‍यन्त मजल गेली होती.

रशियाकडे पाकमध्ये घुसायची ताकद होती का? भारताची गोष्टच सोडा! भले ग्लासनोस्त आणि पेरेस्त्रोईकामुळे रशियन निघाले असतील, पण त्यांचा वारसदार नजीबुल्ला हरला तो सीआयएच्या कृपेने. मुजाहिदीन लोकांच्या हातात स्टिंगर रॉकेटस आल्याने काबूल पडलं.

६.
>> त्यामुळे आजचे पाकिस्तानचे संकट हे उद्या भारताचे संकट असेल हे भौगोलिक सत्य नेहमी लक्षात ठेवले
>> पाहिजे.

म्हणूनच पाकचे तुकडेतुकडे करणं आपल्या हिताचं आहे. जेणेकरून प्रत्येक तुकडा भारतावर अवलंबून राहील.

७.
>> नाही म्हटले तरी आजचे पाक सरकार हे आंतरराष्ट्रीय करार मदार/ प्रोटोकॉल्स याना जबाबदार आहे. म्हणून
>> अण्वस्त्रे असूनही पाक ती आपल्या विरुद्ध वापरू शकत नाही.

हे कोणी सांगितलं तुम्हाला? याला म्हणतात स्वप्नरंजन! पाक अण्वस्त्रे वापरत नाही कारण भारताने आण्विक प्रत्युत्तर दिल्यास पाक पूर्णपणे जळून खाक होईल. तसंही पाक अण्वस्त्र वापरणार असेल तर अमेरिकेला अगोदर कळेलच म्हणा! त्यामुळे चिंता नसावी!!

८.
>> दहशतवाद्यांच्या हिट लिस्टवर असलेल्या मशिद पाडणार्‍या काफिरांवर म्हणजे भारतावर हे अतिरेकी
>> बेछूटपणे अण्वस्त्रे वापरण्याची शक्यता नाही काय?

अशी शक्यता शून्य आहे. याचे कल्पनातीत गंभीर परिणाम पाकला भोगावे लागतील. आणि अमेरिकेस भयाण डोकेदुखी होईल ती वेगळीच! भारतपाक युद्ध एकवेळ भारतास परवडेल, पण अमेरिकेस अजिब्बात परवडणारे नाही.

९.
>> तालिबानीनी कराचीच्या पाकिस्तान नेव्हल सर्व्हिसच्या पी एन एस मेहरान या तळावर हल्ला करून त्याची
>> चुणूक दाखवलीच आहे...

भले शाब्बास! अशीच उत्तरोत्तर प्रगती होवो. पाकी सैन्याला नामोहरम करण्यासाठी भारताने बिनदिक्कीतपणे तालिबानचा वापर करायला हरकत नसावी. शत्रूचा शत्रू तो आपला मित्र!

१०.
>> पाकिस्तानातली अण्वस्त्रे धर्मवेड वगळता कोणताही विधिनिषेध न बाळगणार्‍या 'चुकीच्या हातात' जाण्याच्या
>> शक्यतेने भले भले टरकलेले आहेत . आपण तर त्यांचे पहिले 'गिर्‍हाईक ' असणार आहोत.

तेही आपले पहिले 'गिर्‍हाईक' असणार आहेत. आणि भलेभले टरकलेत ते भारताच्या संभाव्य हानीमुळे नसून पाकच्या सर्वनाशामुळे!

असो.

तुमच्या विचारसरणीची दुसरी बाजू दाखवून द्यायचा एक प्रयत्न मी केला. कितपत पचनी पडतो ते पहा आपण.

आ.न.,
-गा.पै.

म्हणूनच पाकचे तुकडेतुकडे करणं आपल्या हिताचं आहे. जेणेकरून प्रत्येक तुकडा भारतावर अवलंबून राहील
गापै. हे तुकदे भारतावर अवलम्बून राहण्याऐवजी मूलतत्ववाद्यांच्या हाती गेलेले असतील ना. अफगानसारखे. तालिबान लषकर सारख्या संघटनांची बाहुले असतील ही सरकारे...
याचे कल्पनातीत गंभीर परिणाम पाकला भोगावे लागतील. आणि अमेरिकेस भयाण डोकेदुखी होईल ती वेगळीच! भारतपाक युद्ध एकवेळ भारतास परवडेल

गापै. तुम्ही तालिबान/लषरे तोईबा/अल कायदा व्याप्त पाकचा विचार करा ना. त्याना काय करायचे आहे परिणामांचे? परिणामांचा विचार विचारी लोक करतात. ज्याना सस्टेन व्हायचे आहे ते करतात. जिहाद्यांना कसला आला आहे विचार आणि परिनाम. आदरणीय कसाबने सुरुवातीच्या जबाबात(ज्याचा व्हिडिओ आपण चॅनेलवर पाहिला आहे)म्हटलेच होते . हमे बताया गया था की , मारते रहो बस मारते रहो.." तेव्हा कुठे परिणामाचा विचार होता.? त्यामुळे 'तिकडची माणसे' शुद्धीवर राहून कृती करतीलच असे नाही . किम्बहुना नाहीच. तिथल्या सामान्य जनतेला तेव्हाही कोणी विचारात घेणार नाही.राज्यकर्ते आणि सामान्य जनता यांच्या विचार आणि कृतीची दरी तिथेही असते आणि इथेही असतेच (अण्णा हजारेंना सरकारविरुद्ध मिळालेला पाठिम्बा हेच सांगतो.)
भारताने बिनदिक्कीतपणे तालिबानचा वापर करायला हरकत नसावी. शत्रूचा शत्रू तो आपला मित्र!
अशा पद्धतीने मोठे केलेले भस्मासूर मालकावरच उलटलेले कितीतरी दाखले इतिहासात आहेत. भिन्द्रानवाले पासून तर खुद्द लादेन पर्‍यन्त. त्यामुळे हे फारच धोकादायक आहे. इतिहासातून काही गोष्ती शिकल्या पाहिजेत..

अर्थात अर्पना यांनी सांगितल्याप्रमाणे आपले हितसंबंध असलेने इराणला पाठिम्बा म्हणून बलुचिस्तानला पाठिम्बा न देण्याचेच आपले धोरण राहील असे दिसते.शिवाय बलुच्यांच्या स्वायत्ततेनन्तर पाकिस्तानचे आस्तित्व ही त्यांची दोन नम्बरची पसन्ती पहिल्यापासून आहेच त्यामुळे पाकिस्तान नष्ट व्हावे असे त्यानाही वाटत नसावे. फक्त आमचा बलुचिस्तान आम्हाला द्या एवढेच ! :).

दुसर्या महायुद्धानंतर कोरिया, व्हिएतनाम, जर्मनी यांची रशिया व अमेरिकेच्या दबावामुळे फाळणी झाली. सध्याच्या परिस्थितीमध्ये चीनला पाकिस्तानचे अस्तित्व अमेरिकेशी संबंध बिघढू न देता भारताविरुद्ध वापर करण्यासाठी टिकवून ठेवायचे आहे. पण बलुचीस्तांची निर्मिती इराणमध्ये अनागोंदी माजवण्यासाठी अमेरिकेला उपयोगी ठरणार आहे. सध्या अमेरिकेच्या सैन्यांनी नाताळची सुट्टी घेतली आहे. झरदारीनी पाकिस्तान सोडण्याचा अर्थ पाकिस्तानी आर्मी २०१२ पासून अमेरिकेच्या ड्रोन हल्ल्यांना विरोध करणार हे निश्चित झालेले दिसते. तसेच अमेरिका पाकिस्तानचे अणुबॉम्ब ताब्यात घेण्याच्या तयारीत आहे. पण पाकिस्तानचे अणुबॉम्ब = पाकिस्तानचे अस्तित्व अशी परिस्थिती असल्याने पाकिस्तान अण्वस्त्रे लपवण्याचा जिवापाड प्रयत्न करत आहे. अतिरेक्याच्या हातात अणुबॉम्ब पडण्याच्या शक्यतेने अमेरिका स्वतःचा भूमिकेवर ठाम दिसते. जर पुढच्या २-३ वर्षात बलुचिस्तानच्या स्वात्रन्त्राची चळवळ सुरु झाली तर पाकिस्तानात आणखी अनागोंदी माजेल. त्याचा फायदा घेऊन जागतिक शांततेकरता अमेरिका अण्वस्त्रे ताब्यात घायची संधी साधेल. पण यामुळे अमेरिका आणि पाकिस्तानात युद्ध होणार. अर्थात त्यामध्ये अमेरिका बलुची बंडखोरांची मदत घेईल व त्याबदल्यात बलुचिस्तान हे मांडलिक राष्ट्र निर्माण करेल. बाकी उरलेला पाकिस्तान भविष्यात चीनचे इस्रायेल म्हणून सार्वभौम राहील.

गा.पै.,

उत्तम उत्तर.

अर्पणा यांच्या प्रतिसादातील खालील वाक्ये पटली.
"इतिहास बघता पाकिस्तानमधली तथाकथित लोकशाही सरकारं काही भारताच्या दृष्टीनं काही विशेष चांगली म्हणता येत नाहीत. मित्रराष्ट्र बळकट असल्यास उत्तम पण शत्रु राष्ट्र स्टेबल आणि स्ट्राँग असल्याचे फायदे कमी आणि तोटे जास्त."

पाकिस्तानमध्ये जेव्हाजेव्हा लोकशाही मार्गाने सरकार आले तेव्हाच जिहाद व काश्मिरमधल्या फुटीर कारवाया जास्त वाढीस लागल्या असे दिसून येते. सीमेवरील शत्रूला जितके दुर्बल करता येईल तितके चांगले.

>>> पाकिस्तानातली अण्वस्त्रे धर्मवेड वगळता कोणताही विधिनिषेध न बाळगणार्‍या 'चुकीच्या हातात' जाण्याच्या शक्यतेने भले भले टरकलेले आहेत . आपण तर त्यांचे पहिले 'गिर्‍हाईक ' असणार आहोत.

बाळासाहेब,

मग सध्याच्या काळात पाकिस्तानातील अण्वस्त्रे ही "चुकीच्या हातात" नाहियेत का? का ती "योग्य हातात" आहेत? या अण्वस्त्रांना पाय फुटून ती उत्तर कोरियाच्या हातात कोणाच्या हातातून गेली? उ. कोरियामध्ये अण्वस्त्रे जाताना ती काही बलुची/पख्तुनी/सिंधी मोहाजिर यांच्या हातातून तर गेली नाहीत ना? आता व गेली १५-२० वर्षे लोकशाहीचा देखावा करून जे सत्तेवर आहेत (नवाज शरीफ, पीपीपी इ.) त्यांच्या काळातच अण्वस्त्रे पाकिस्तानच्या बाहेर गुपचुप गेली होती. त्यामुळे धर्मवेडे सत्तेवर आले तर अण्वस्त्रे चुकीच्या हातात जातील हे गृहीतकच चुकीचे आहे. पाकिस्तानची अण्वस्त्रे निर्मितीपासून आजतगायत चुकीच्या हातातच आहेत. पाकिस्तानने प्रथम अणुहल्ला केला तर भारत प्रतिहल्ला करून पाकिस्तान बेचिराख करेल व आंतरराष्ट्रीय पातळीवर पाकिस्तानच दोषी समजला जाईल हे पाकिस्तानी राज्यकर्त्यांना चांगले माहित असल्याने पाकिस्तानातले सत्ताधारी भारतावर अण्वस्त्रेहल्ला करायला धजणार नाहीत. उद्या क्रांती होऊन बलुची टोळीवाले किंवा धर्मवेडे सत्तेवर आले तरी हीच परिस्थिती असेल.

>>> १९८० च्या दरम्यान रशिया जेव्हा अफगाणिस्तानात घुसून बसला होता तेव्हा काहीतरी निमित्त काढून तो प्रथम पाकिस्तानात व नन्तर भारतात घुसण्याची भीती काही निरीक्षकाना वाटत होती. तेव्हा तर भारत आणि पाकिस्तानने एक संयुक्त फेडरेशन स्थापन करावे असा विचार दोन्ही देशातील विचारवन्तानी मांडण्यापर्‍यन्त मजल गेली होती. म्हणजे परिस्थिती किती टोकाला केली होती.

हे कोठे वाचल्याचे आठवत नाही. याविषयी एखादा संदर्भ आहे का?

'भारत व पाकिस्तान यांनी एक व्हावे. दोन्ही देशांची संस्कृती एकच आहे. भारत-पाकिस्तानमधल्या समस्या या दोन्ही बाजूंच्या राजकारण्यांनी निर्माण केल्या आहेत. सर्वसामान्य नागरिकांचा त्यांना पाठिंबा नाही. जर दोन जर्मनी एक होऊ शकतात, तर भारत्-पाकिस्तान का एक होऊ शकत नाहीत.', हे व अशासारखे भाबडे विचार भारतातले काही तथाकथित (अ)विचारवंत नेहमीच मांडत असतात (उदा. कुलदीप नय्यर). त्यामुळे रशियाची काल्पनिक भीति दाखवून 'भारत आणि पाकिस्तानने एक संयुक्त फेडरेशन स्थापन करावे' असा विचार काही जणांनी मांडणे हे अशक्य नाही.

>>> १९८९ नंतर कश्मिर दहशदवाद - सिव्हिलियन सरकार (इथे एक महत्वाची गोष्ट लक्षात ठेवली पाहिजे कीं १९८९साली रशियाने अफगाणिस्तानमधून माघार घेतल्यावर मुजाहिदीन सैन्याची परिस्थिती कांहींशी "रिकामा न्हाव्या"सारखी झाली होती! या रिकाम्या न्हाव्यांना कामाला कुणी लावले? तर पाकिस्तानी कोल्हा मुशर्रफ!! याच कोल्ह्याला आपण आग्र्याला बोलवून नसलेली 'राजकीय इज्जत' दिली! शिवाय बेनझीरबाईंच्या पहिल्या कारकीर्दीत ती कठपुतळीच होती.

काळेसाहेब,

एक दुरुस्ती. १९८९ नंतर अफगाणमध्ये लढणार्‍या मुजाहिदिंना प्रथम बेनझीर भुट्टोने (१९८८-१९९० व १९९२-१९९४)) व नंतर नवाझ शरीफने (१९९०-१९९२) काश्मिरमध्ये जिहाद करण्यासाठी कामाला लावले. त्याआधी त्याची पूर्वतयारी झिया उल हकने (१९७८-१९८८) सुरू केली होती. बेनझीर व नवाझ शरीफने झियाची पूर्वतयारी पूर्णत्वाला नेली. मुशर्रफ जेव्हा १९९९ मध्ये सत्तेवर आला तेव्हा हे रिकामे न्हावी आधीच कामात गढून गेले होते.

अतिशय उत्तम पोष्ट आणि उत्तम प्रतिसाद...........अभिनंदन सुधीर साहेब

आत्ता पर्यंत वाचनात आलेली उत्तम आणि वाट न चुकलेली पोस्ट........... पहिल्या पासुन मी नुसतीच वाचतोय..कारण बलुचीस्तान यावर माझी माहीती अत्यल्प आहे.. अशा वेळी अक्कल न पाजळलेलीच चांगली

चालु द्या.......... छान माहीती आहे

हे व अशासारखे भाबडे विचार भारतातले काही तथाकथित (अ)विचारवंत नेहमीच मांडत असतात (उदा. कुलदीप नय्यर)

>>
या पोस्टवरून तुम्हाला चर्चा करायची नसून नेहमीचेच प्रचारी तत्वज्ञान मांडायचे आहे हे या पोस्ट वरून दिसते आहे. त्यामुळे तुमच्या पोस्त वाचण्याचे कष्ट घेण्याचे यापुढे कारण नाही असे दिसते. लोकशाहीत माझे बरोबर आहे पण दुसर्याचे ही बरोबर असू शकते हे मुख्य तत्व असावे . पण शेवटी तुम्ही तुमच्या नेहमीच्या 'वळणावर' गेलातच... नय्यर यांचे म्हनणे बरोबर नसेलही. पण ही काही पद्धत नव्हे. त्यासाठी इतर बीबी आहेतच...

बा.जो.

>> लोकशाहीत माझे बरोबर आहे पण दुसर्याचे ही बरोबर असू शकते हे मुख्य तत्व असावे .

किती ताणता हो तुम्ही. आणि लोकशाही कशाला फरपटत आणलीत मध्ये!

कोणाचं बरोबर आणि चूक हा प्रश्न नाहीच्चे मुळी. जर दोन जर्मनी एकत्र होऊ शकतात तर भारत पाक एक का होत नाहीत, याचं कारण तुम्हाला माहीत असेलंच.

ही दोन दृष्टीकोनांमधली तफावत आहे. आपापले दृष्टीकोन बरोबर किंवा चुकीचे नसतात. ते व्यक्त करायचे असतात. फारतर एकमेकांना पटवून द्यायचे असतात.

घ्या

आ.न.,
-गा.पै.

मास्तुरेंची टोपी गा पैंना फिट्ट कशी बसली ?

अहो बा.जो., कशी म्हणून काय विचारता! ग्रेट माईंड्स थिंक अलाईक!

हे मात्र खरं ...:)

>>> या पोस्टवरून तुम्हाला चर्चा करायची नसून नेहमीचेच प्रचारी तत्वज्ञान मांडायचे आहे हे या पोस्ट वरून दिसते आहे.

बाळू जोशी,

तुमचा असा प्रॉब्लेम आहे की आपल्या ठाम समजूतीच्याविरूद्ध लिहिलेलं तुम्हाला व तुमच्या स्कूलला अजिबात आवडत नाही. त्यामुळे तुम्हाला माझ्या प्रत्येक प्रतिसादातून प्रचारी तत्वज्ञानच दिसते. तुम्हाला कावीळ झाली आहे हे स्पष्ट दिसून येत आहे.

>>> त्यामुळे तुमच्या पोस्त वाचण्याचे कष्ट घेण्याचे यापुढे कारण नाही असे दिसते.

वाचू नका. अजिबात आग्रह नाही.

>>> लोकशाहीत माझे बरोबर आहे पण दुसर्याचे ही बरोबर असू शकते हे मुख्य तत्व असावे .

'लोकां सांगे . . . ' ! हा नियम आपण सर्वप्रथम स्वत:ला लागू करावा ही नम्र विनंती.

>>> पण शेवटी तुम्ही तुमच्या नेहमीच्या 'वळणावर' गेलातच...

तुम्ही काय सरळ चालत आहात का? तुम्ही सुद्धा नेहमीप्रमाणे तुमच्या नेहमीच्या 'वळणावर' गेलातच की!

>>> नय्यर यांचे म्हनणे बरोबर नसेलही. पण ही काही पद्धत नव्हे. त्यासाठी इतर बीबी आहेतच...

मग कुठली पद्धत आहे?

रशिया भारतात घुसण्याची इथल्या विचारवंतांना भीति वाटत होती म्हणून भारत पाकिस्तानने एक व्हावे अशा अर्थाचे तुम्हीच लिहिले होते. म्हणून मी इथे लिहिले.

या वाक्यातल्या पहिल्या भागासंबंधी (रशिया भारतात घुसण्याची भीति) मी आजतगायत कुठेच वाचले नव्हते. त्यामुळे याबद्दल तुम्हाला मी संदर्भ देण्यास सांगितले होते. तो संदर्भ दिल्यास माझे अज्ञान दूर होईल.

दुसरा भाग (भारत पाकिस्तानने एक व्हावे) हा इथल्या कुलदीप नय्यरांसारख्या भाबड्या (अ)विचारवंतांचे खूप जुने स्वप्नरंजन आहे. १४ ऑगस्ट १९९७ रोजी मध्यरात्री १२ वाजता भारत व पाकिस्तानच्या स्वातंत्र्याच्या सुवर्णमहोत्सवानिमित्त हे नय्यर आपल्या इतर भाबड्या सहकार्‍यांना घेऊन पाकिस्तानच्या बॉर्डरपाशी गेले होते. तिथे मेणबत्त्या लावून शातंतेचा संदेश देणे, भारत पाकिस्तान मैत्रीच्या (?) घोषणा देणे व भारत पाकिस्तान हे एकच आहेत अशा स्वरूपाचा संदेश देणे हा त्यांचा उद्देश होता. त्यांचे परममित्र श्री. इंद्रकुमार गुजराल हे त्यावेळी पंतप्रधान असल्याने त्यांच्या या कृतीला सरकारी पाठबळ सुद्धा होते. पण त्यांच्या या बालिश कृतीला पाकिस्तानकडून अत्यंत नकारात्मक व कुचेष्टेचा प्रतिसाद मिळाला होता. जगातल्या कोणत्याही घटनेची भारत पाकिस्तान प्रश्नाशी सांगड घालून भारत पाकिस्तानने एक व्हावे असे भाबडे स्वप्न हे कायम बाळगून असतात. रशियाच्या अफगाणिस्तानवरील आक्रमणाचा सुद्धा याच प्रश्नाशी संबंध जोडून आपले जुने स्वप्न पुढे आणणे हे यांच्या बाबतीत अशक्य नाही. म्हणून मी हा संदर्भ दिला.

असो. बहुत काय लिहिणे.

>>> चूक नाहीं आहे! आपण माझ्या अनुवादित "न्यूक्लियर डिसेप्शन"ची १०-१३ ही चार प्रकरणे वाचावीत असा मी आग्रह करेन.

पूर्वी वाचले होते. पुन्हा एकदा वाचून बघतो.

अतिशय उत्तम पोष्ट आणि उत्तम प्रतिसाद...........अभिनंदन सुधीर साहेब

आत्ता पर्यंत वाचनात आलेली उत्तम आणि वाट न चुकलेली पोस्ट........... पहिल्या पासुन मी नुसतीच वाचतोय..कारण बलुचीस्तान यावर माझी माहीती अत्यल्प आहे.. अशा वेळी अक्कल न पाजळलेलीच चांगली

चालु द्या.......... छान माहीती आहे>>>>>>>>>>>>>>>>>>

+१