रगडा पॅटिस पाणीपुरीवर फरसाणही दिसले -

(चाल: ब्रह्मा विष्णू आणि महेश्वर सामोरी बसले-)

रगडा पॅटिस पाणीपुरीवर फरसाणही दिसले
मनीं हे ' फस्त करू ' म्हटले .. |धृ|

जाय उभी ही गाडी करुनी
पुढ्यात, भैया पाहे वळुनी -
हॉटेलवाले शांत बिचारे गल्ल्यावर सुकले .. |१|

पाणी भयंकर सुटता तोंडी
खमंग बनते शेव पापडी
रिक्षामधले प्रणयपाखरू खुषीत का हसले .. |२|

तुमची ' माया ' - माझी किमया
कृतार्थ झालो , म्हणतो भैया -
भेळकचोरीसाठी गिऱ्हाईक खोळंबुन बसले .. |३|