जवसाचा गोड भात

खास बाळाच्या आईसाठी हा भात आहे. यासाठी थोडी तयारी करून ठेवावी लागेल.
दोन कप बारिक तांदूळ आणि दोन कप मूग डाळ धुवुन वाळवून घ्यावेत. कढईत मंद आचेवर दोन्ही तांबूस रंगावर भाजून घ्यावेत.
एवढ्या प्रमाणाला एक चमचा ओवा, दोन चमचे बाळशेपा आणि चार चमचे बडिशेप वेगवेगळे भाजून घ्यावे. बाळशेपा म्हणजेच दिलसीड्स व बडिशेप यांची भरड पूड करून हे सगळे जिन्नस एकत्र करून ठेवावे.
अर्धाकप जवस भाजून त्याची पूड करून वेगळी ठेवावी,
भात करतेवेळी एक चमचा साजूक तूप गरम करून त्यात एखादी वेलची वा लवंग टाकावी. मग वरील मिश्रणातले एक कप मिश्रण परतावे. दोन कप गरम पाणी घालून भात शिजू द्यावा. त्यातच एक चमचा जवसाची पूड आणि भात नीट शिजल्यावर लिंबाएवढा गूळ घालावा. झाकण ठेवून भात मुरु द्यावा. खाताना थोडे तूप घ्यावे. हा भात काळपट दिसला तरी खूप चवदार लागतो. गरम वा गार कसाही खाता येतो. आणि बाळाच्या आइसाठी उत्तम आहार आहे.