नि गुलाब लाल होतात

भुलून गंधाला त्यांच्या, सारेच असतात जवळ जात
काटे घेतात रक्त शोषून नि गुलाब लाल होतात

चंद्र चमकतो अंधारात, चोरून सूर्याचा प्रकाश
कातडे ओढून का कुठे गाढवांचे वाघ होतात?

भारतातले सामान्य लोक, म्हणे जास्त अन्न खातात
यालाच तर सारे चोराच्या, उलट्या बोंबा म्हणतात

जग हे ऐंशी टक्के सारे, बुडते रोज अंधारात
विसां साठीच फक्त ते सारे दिवे उजळून निघतात

हिशोब कशाचा तो आता, मी फारसा ठेवत नाही
मने मोडून पडताच सारे अंक विसरून जातात

इथे बळी तो कान पिळी, इतरांस कोणी नसे वाली
देवा कृपा करून जरासा देशीलका त्यांना हात

सुधीर