लेखन उपक्रम २ - विल्हेवाट - मामी

बाकीचे अजून आले नव्हते. गाडी यायला तसा वेळच होता तेवढ्यात त्याचं लक्ष तिच्याकडे गेलं...

तिने नेहमीप्रमाणेच रेशमी फुलाफुलांचे वस्त्र परिधान केले होते. केशभूषणांनी तिचे केस सुरेखशा रचनेत मस्तकावर रचले होते. लाडिकपणे दांतात धरलेली गवताची काडी तिच्या ओठांवर मोहक दिसत होती! तिच्या हातात काळा मखमली बटवा शोभून दिसत होता - रोजच्याप्रमाणेच!

तो त्या अप्सरेकडे एकटक बघतच राहिला. आजची सकाळही कारणी लागली म्हणायची!

....................... टिंग टिंग!!!!

"भाऊ, टाका ती कचर्‍याची पिशवी गाडीत. रोज काय शेजारणीकडे टक लावून बघता! "

स्वतःच्या हातातील कचराबॅग घंटागाडीत टाकत शेजारणीनं त्याच्याकडे जळजळीत कटाक्ष टाकत तोंडातला टूथब्रश काढून जमलेला फेस बाजूला थुंकला आणि नाईटी एका हातानं सावरत तिने डोक्यावरचे कर्लर्स चाचपले.